Kubungabunga ibinyabuzima ntibikiri umuco w’abanyarwanda kubera iterambere- Rutangarwamaboko

Iterambere ririmo gushyira ibiyabuzima mu byanya bikomye ngo bijye bisurwa na ba mukerarugendo byatumye abanyarwanda bacika ku muco wo kubibungabunga nk’uko byahoze mu muco wabo none ngo babihejweho nk’uko bigarukwaho n’Umupfumu Rutangarwamaboko mu kiganiro yagiranye na Rwandanews24.

Mu muco nyarwanda tugira indagagaciro na kirazira kandi tuzigenderaho mu migirire no mu muco nyarwanda, ariko ngo kirazira mu rwego rwo kubungabunga ibinyabuzima zarirengagijwe.

Rutangarwamaboko ati: “Mu muco yarwanda abantu babanaga n’ibinyabuzima mu nzu nk’inzoka ndetse zikitwa ibiryambeba, ariko ubu ni ukuzishyira mu byanya bikomye aho no kuzireba bisaba kwishyura kandi abenshi bafite amikoro macye. Njyewe ntabwo mbishima kuko n’amazina y’ibisekuru by’abanyarwanda ashingiye ku nyamaswa.”

Aha atanga urugero rwa bimwe mu bisekuru by’abanyarwanda bishingiye ku mazina y’inyamaswa: Ubwoko bw’abagesera bushingiye ku nyoni y’Inyamaza, Abega bashingiye ku Gikeri, Abazigaba bashingiye ku Ngwe, Abanyiginya bashingiye ku Misâmbi n’ ayaindi atandukanye.

Akomeza avuga ko inyoni y’inyamanza yabungabungwaga by’umwihariko mu muco nyarwanda kuko iyo yazaga mu rugo yabaga isura gutunga n’uburumbuke ari naho havaga imvugo igira iti ‘Inyamanza iranyerera ntiyona’. Si ibi gusa kuko iyo umusore yasizaga ikibanza agiye kubaka, impamvu bamaraga igihe bataratangira imirimo yo kubaka kwabaga ari ukugirango barebe ko inyamaza izakigwamo, bisobanuye ko azaremya urugo rugakomera. None kubera gushyira inyoni mu byanya bibungabungwa abantu basigaye bubaka zigasenyuka zitamaze kabiri.

Imisambi ni zimwe mu bwoko bw’inyoni burimo kubungabungwa by’umwihariko kuko yari irimo gucika

Ati: “Nk’ubu biragoye kubona umusambi munsi y’urugo ahegereye igishanga cyangwa mu bishanga birimo amavomo aya bita kano. Imisambi yashyizwe ahantu hamwe njyewe mbona nko kuyibuza uburenganzira kuko ubusanzwe muri kamere yayo itungwa n’udukoko two mu gishanga ikogoga umubande wose ishaka ibyo kurya kuburyo yashoboraga kuva mu murenge umwe ikirirwa mu gishanga cy’undi murenge ikaza gutaha igihe cy’izuba rya Kiberinka. Kuyishyiriraho imbibe numva ataribwo buryo bwiza bwo kuyibungabunga kuko n’igisekuru ihagarariye ntibona uko ijya kuhatemberera.”

Mu rwego rwo kurengera urusobe rw’ibinyabuzima no gusigasira ibirimo kugabanuka kuburyo bishobora no gucika, hashyizweho uburyo bwo kubibungabunga harimo no kubishyira mu byanya bikomye ngo byitabweho by’umwihariko nk’uko bikubiye mu masezerano y’I Paris (Paris Agreements) n’amasezerano avuguruye ya Kigali (Kigali Amendments) u Rwanda rwashyizeho umukono.

Subiza ku gitekerezo

Your email address will not be published. Required fields are marked *