Rutsiro: Uwamahoro wasaruraga ibishyimbo yafashwe n’amashanyarazi yakuruwe bitemewe n’amategeko arapfa

Mu gitondo cyo kuri uyu wa 26 ukuboza 2022, Uwamahoro Jeanine wo mu karere ka Rutsiro, umurenge wa Kivumu ubwo yasaruraga ibishyimbo yafashwe n’umuriro w’amashanyarazi arapfa.

Ibi byabereye mu kagari ka Kabujenje ho mu mudugudu wa Rurembo, mu masaha ashyira saa mbili z’igitondo.

Munyamahoro Patrick, Umunyamabanga nshingwabikorwa w’umurenge wa Kivumu yahamirije Rwandanews24 aya makuru.

Ati “Impanuka y’amashanyarazi yishe Uwamahoro Jeanine w’imyaka 34 aho yasaruraga ibishyimbo by’imishingiriro mu murima, yaje gukora ku kurusinga rw’umuriro rwanyuraga muri uwo murima bamujyana ku kigo nderabuzima cya Kivumu ahageze ahita apfa.”

Munyamahoro akomeza avuga uyu muriro w’amashanyarazi wanyuraga mu murima wa nyakwigendera wari warakuruwe n’abaturanyi ku buryo bunyuranyije n’amategeko, ku buryo wari warashyizwe ku biti bito, akaboneraho gusaba abaturage kwiyambaza abakozi ba REG igihe cyose bakeneye amashanyarazi.

Munyamahoro kandi yavuze ko ubu barimo guhiga bukware uwakuruye aya mashanyarazi ngo nawe abiryozwe.

Umurambo wa nyakwigendera ubwo twakoraga iyi nkuru wari ukiri kwa muganga bategereje ibisubizo bya RIB ngo ibemerere ashyingurwe nyuma y’ibirava mu iperereza.

Uwamahoro Jeanine yishwe n’amashanyarazi yafashwe bitemewe n’amategeko
Uwamahoro Jeanine yiagejejwe ku kigo nderabuzima ahita yitaba Imana

One thought on “Rutsiro: Uwamahoro wasaruraga ibishyimbo yafashwe n’amashanyarazi yakuruwe bitemewe n’amategeko arapfa

  1. Bagenzure hari henshi amasinga agaragara hasi ndetse anahateranyirije kdi hadafunitse, bikemurwe Kare hadategerejwe ko bihitana ubuzima bw’abantu. Ingero zirahari myinshi rwose

Subiza ku gitekerezo

Your email address will not be published. Required fields are marked *