Isazi zigiye gukemura ikibazo cy’igiciro gihanitse ku biryo by’amatungo mu Rwanda

Mu gihe bamwe mu borozi bavuga ko izamuka ry’ibiciro by’ibiribwa ritasize iry’ibiciro by’ibiryo by’amatungo kuko ubu birimo kwigondera uwifite ugereranyije n’ubushobozi bwabo nk’uko abaganiriye na Rwandanews24 babivuga, RAB yo ivuga ko iki kibazo kigiye gukemuka kuko batangiye korora isazi zizatuma iki giciro kigabanuka.

Abakora ubworozi bwiganjemo ingurube n’inkoko nibo bavuga ko baremerewe n’igiciro cy’ibiryo by’amatungo.

Umworozi w’ingurube waganiriye na Rwandanews24 agira ati: “Mbere y’uko ibiciro bizamuka naguraga ikiro cy’ibiryo by’ingurube amafaranga ari hagati ya 250frws na 300frws bitewe n’aho naguriye, ariko ubu ikiro kiragura amafaranga 450frws. Ibi byatumye nsubira inyuma kuko kubona ibiryo bizihagije birasaba amikoro arenze ayo mfite.”

Akomeza avuga ko ababifite mu nshingano by’umwihariko abareberera aborozi bakwiriye kubavugira kuko bitabaye ibyo abafite amikoro macye turaza kuzigurisha dusubire mu bukene.

Mugenzi we Worora inkoko, we avuga ko kugeza atakibasha kuzigurira ibyo kurya bitewe n’uko ibyo bita sondoro n’inshenga z’umuceri bajyaga bifashisha byahenze.

Ati: “Ubu sondoro twaguraga 300frws igeze kuri 450frws, hari n’aho bayarenza. Naho umuceri w’inshenga wagenewe kugaburirwa inkoko twawuguraga 300frws, none ubu ugura hagati ya 700frws na 800frws bitewe n’aho uwuguriye. Leta itekereze ku borzoi wenda izaduhe na nkunganire ariko ntitubihagarike.”

Mu kiganiro Rwandanews24 yagiranye n’Umuyobozi wungirije w’Ikigo cyita ku buhinzi n’ubworozi (RAB), Dr Uwituze Solange avuga ko ikibazo cy’ibiciro by’ibiryo by’amatungo bakizi kandi ko kirimo gushakirwa umuti urambye.

Ati: “Kuva intambara y’Uburusiya na Ukraine yatangira ibiciro ku isoko byarazamutse bitewe n’uko bimwe mu byo twakuraga mu mahanga byahagaze harimo n’ibyo kurya by’amatungo. Mu rwego rwo gukemura iki kibazo ku buryo burambye, twatangiye gukora ibiryo by’amatungo bisimbura ibyo twakuraga hanze kandi byamaze kujya ku isoko ubu birakoreshwa nubwo bitaraba byinshi ngo buri mworozi ubikeneye bimugereho.”

Abajijwe ubwoko bw’ibyo biryo by’amatungo bigeye gusimbura ibyavaga mu mahanga yagize ati: “Twatangiye korora isazi z’umukara kugirango zisimbure indagara zavaga hanze, nubwo tukizibona ariko zaragabanutse bituma igiciro cyazo kizamuka. Izi sazi iyo uzigaburiye inkoko cyangwa ingurube ntukenera izindi ntungamubiri z’ibikomoka ku nyamaswa. Izi sazi zitanga iminyorogoto, nayo ikaba ari ibiryo by’amatungo bikungahaye ku ntungamubiri z’amatungo”

Kuva intambara y’Uburusiya na Ukraine yatangira, ibiciro by’ibintu bitandukanye byarazamutse harimo ibikomoka kuri peterori, ibiciro by’ibiribwa ndetse n’ibiciro by’ibiryo by’amatungo, ariko ku biryo by’amatungo isazi zikaba zigiye gukemura iki kibazo.

Subiza ku gitekerezo

Your email address will not be published. Required fields are marked *