Rutsiro: Abahinzi b’icyayi bavuze imyato Umukuru w’Igihugu

Ku nshuro ya gatanu hizihizwa umunsi ngarukamwaka w’umuhinzi w’icyayi muri Rutsiro Tea Factory, abahinzi b’icyayi bo mu mirenge ya Murunda, Gihango, Manihira, Rusebeya, Mushubati na Mukura ho mu karere ka Rutsiro bavuze imyato Umukuru w’Igihugu, Paul Kagame.

Babigarutseho kuri uyu wa 15 ukuboza 2022, mu birori byari bifite insanganyamatsiko igira iti “Ubuhinzi bw’icyayi, inkingi yiterambere rirambye.”

Abahinzi b’icyayi baganiriye n’itangazamakuru bose bagarutse ku iterambere kimaze kubagezaho, bagasanga byose babikesha imiyoborere myiza ya Paul Kagame.

Nsengimana Gaspard utuye mu murenge wa Gihango yagize ati “Natangiye guhinga icyayi muri 2017 mpinga ha 2, nyuma naje gukora pepiniere mfashijwe na RUTEGROC naguraho indi ha 1,5 kandi nasanze binteza imbere mpitamo kureka akazi ka Leta nakoraga, aho nari umwarimu kandi mpembwa neza nza kubisezera none ngeze ku buhinzi bwa ha 5,5 kandi ngiye kongera ingemwe zirenga ibihumbi 50, nasanze ubuhinzi bw’icyayi bumpa amafaranga akubye 3 ayo nahembwaga mu bwarimu, kuko ku kwezi simbura ibihumbi 500 frw.

Ubuhinzi bw’icyayi maze kubona ko buri ku isonga mu kunteza imbere ndasaba abahinzi ku kibungabunga kugira ngo kizabahe gukirigita ifaranga kandi abataratangira ku gihinga baza tukabacira ku mayange.

Icyifuzo cyacu n’uko twakorerwa imihanda, kuko aho itari bituma icyayi gitakaza ubwiza, tukaba dusaba ko badukorera ubuvugizi umusaruro ukajya ugera ku ruganda ku gihe kandi itameze neza bakayisana. Tukaba tunasaba ibikoresho by’ibanze mu gihe cyo gutubura ingemwe nk’ibihoho naza shitingi zo gutwikira.

Nsengimana Gaspard akomeza agira ati “Icyayi cyatubereye nk’ikirombe cya zahabu, tukaba dushimira Kagame Paul waduhaye uruganda akanateza imbere ubuhinzi bw’icyayi no kudushakira amasoko mu mahanga.

Akomeza ashimira Rutsiro Tea Factory ko ibishyurira ku gihe nabo bakabasha kwikenura no kwiteza imbere.

Uriho Jean, utuye mu murenge wa Murunda kuva muri 2014 n’umuhinzi w’icyayi avuga ko yashakaga ikintu cyajya kimuha amafaranga buri kwezi kandi ari umuturage.

Ati “Nahinze icyayi kuko nifuzaga kubona ikintu cyajya kimpemba buri kwezi kandi ntakorera Leta, ngitangira gusoroma nasoromye ibiro bitatu bitarengeje amafaranga 1,500 frw ariko kuri ubu ngeze kuri toni imwe ku kwezi icyayi kikaba kinyinjiriza umushahara urenga ibihumbi 200 frw ku kwezi.

Uriho ashimira ko kuri ubu atagikenera inguzanyo muri SACCO ngo ayibure, kuko niyo akeneye arenga miliyoni 2 frw bayamuha akabasha gukemura ibibazo bye, ibi bikaba byaramufashije kwivugururira inzu ye ashyiramo sima, abana abishyurira amashuri y’imyuga abandi arabashyingira.

Yaba Uriho na bagenzi be bashimira Leta y’ubumwe ukuntu irebera abanyarwanda ibyabateza imbere ibazanira ibihingwa bo batari gutekereza kuko icyayi muri aka karere ari igihingwa gishya.

Niyitegeka Theoneste utuye mu murenge wa Manihira yatangiye agura icyayi cya bagenzi be ariko yageze aho ahembwa nk’uwaguye ubuso bw’icyayi.

Ati “Natangiye ngura icyayi cya ha 1 mu myaka 7 itambutse aho ninjizaga ibihumbi 80 frw ku kwezi, mbona ko byantunga mpitamo kwagura mpinga ha3 zindi zose  ziba 4, kuri nkaba ngeze ku bihumbi 170 fr ku kwezi.”

Niyitegeka yishimira ko icyayi cyamuteje imbere muri byinshi, kuko nk’umuhinzi uhembwa buri kwezi kandi atarabashije kwiga bimufasha gukomeza kongera ubuso bw’icyayi.

Nk’umwe mu bagabiwe na Rutsiro Tea Factory ashimira Uruganda rwamugabiye.

Ati “Ndishimira inka nahawe na Rutsiro Tea Factory, kuko izamfasha kubona ifumbire yo gushyira mu cyayi mu gihe nayiguraga, kandi ikazanakamirwa abana.

Prof. Dr. Tombola M. Gustave, wari uhagarariye Rwanda Mountain Tea ari nayo ifite uruganda rutunganya icyayi rwa Rutsiro Tea Factory asanga ari ibyo kwishimira ko umuhinzi w’icyayi atera imbere akabasaba kubishimira Leta y’ubumwe.

Ati “Kuri ubu twishimira ko umuhinzi tumugurira icyayi ku giciro cyiza kandi kimubereye, tukaba tumusaba gushimira ubuyobozi bwiza bw’Igihugu kirangajwe imbere na Paul Kagame kuko yahaye umunyarwanda ubwisanzure mu ishoramari maze umuturage ajya ku isonga, ibyo byatumye nk’umushoramari nka Rwanda Mountain Tea ashore imari mu nganda zitunganya icyayi.

Prof. Dr. Tombola akomeza avuga ko kampani (Rwanda Mountain Tea) ibaho ibereyeho abaturage akaba ariyo mpamvu ikora ibikorwa byinshi bigaruka ku mibereho y’abaturage, nko ku bubakira ama ECD, kubegereza amazi meza, girinka no kubishyurira ubwisungane mu kwivuza kugira ngo umuhinzi w’icyayi agire ubuzima buzira umuze.

Rwanda Mountain Tea yasezeranyije abahinzi b’icyayi muri aka karere ko izakomeza gukora ibikorwa bifasha abahinzi b’icyayi bashyira imbaraga mu kubaka ama ECD, kubakira amacumbi abatishoboye, girinka, kubaka amashuri, kandi bakazakomeza kugira uruhare mu gutuma umusoromyi n’umuhinzi w’icyayi babaho neza.

Murekatete Triphose, Umuyobozi w’akarere ka Rutsiro ashimira uruhare rw’uruganda rw’icyayi mu gufatanya n’abahinzi mu kongera ubuso buhingwaho icyayi akaavuga ko nabo nk’ubuyobozi bagiye gushyira imbaraga mu bikibereye abahinzi b’icyayi imbogamizi.

Ati “Turashimira uruganda rw’icyayi kubera uruhare rwabo mu gufasha abaturage, turakangurira abahinzi kongera ubuso buhingwaho icyayi, mu kongera umusaruro w’icyayi mu bwiza no mu bwinshi.

Tubasezeranyije ubuvugizi kugira ngo ingemwe z’icyayi zijye zibonekera ku gihe, twabivuganyeho na NAEB kandi abangiriza icyayi bazahanwa bikurikije amategeko kugira ngo icyayi gikomeze giheshwe agaciro. Na gahunda yo guhugura abasoromyi b’icyayi ingengo y’imari izahugura abagera kuri 400 irahari tukazatangirana na mutarama 2023.

Ikibazo cy’imihanda harimo n’umuhanda wa Twabugezi Murekatete Triphose agira ati “Twamaze kuvugana na RTDA ukaba uri mu mihanda izakorwa kugira ngo umusaruro ubashe kugera ku ruganda utangiritse.”

Uruganda rwa Rutsiro Tea Factory muri uyu muhango rwahembye abahinzi n’abasoromyi bahize abandi aho batanze inka 5, ihene 24, ibitenge 15, amasuka 10, bote 25, radio 7, terefone 10 n’ibindi byahembwe abahinzi n’abasoromyi 126 bintangarugero. Mu bindi bikorwa uruganda rwakoze harimo kwishyurira abantu 400 batishoboye mutuelle de sante.

Uruganda rwatangiye gukora muri Gicurasi 2014 muri uwo mwaka rwatunganyije toni ibihumbi 58,386 by’icyayi, ni mu gihe mu mwaka wa 2021 rwatunganyije Toni zirenga miliyoni imwe.

Abahinzi n’abasoromyi 126 bintangarugero bahembwe n’Uruganda rwa Rutsiro Tea Factory rwatanzwe inka 5, ihene 24, ibitenge 15, amasuka 10, bote 25, radio 7, terefone 10 n’ibindi bihembo
Niyitegeka Theoneste nk’umwe mu bagabiwe na Rutsiro Tea Factory ashimira Uruganda rwamugabiye
Abayobozi batandukanye bitabiriye uyu muhango
Abayobozi kandi beretswe imikorere y’uruganda
Nzamwita Aloys, uyobora koperative y’abahinzi b’icyayi RUTEGROC nawe ni umwe mu bishimiye uruganda begerejwe bagobotorwa ingoyi yo kugemura icyayi mu karere ka Karongi
Abahinzi b’icyayi bari babukereye

Subiza ku gitekerezo

Your email address will not be published. Required fields are marked *