Mayor Kambogo yatungiye agatoki abanyamuryango ba FPR Inkotanyi ibikibangamiye iterambere ryabo

Kambogo Ildephonse, Chairman w’umuryango mu karere ka Rubavu yatungiye agatoki abanyamuryango ba FPR Inkotanyi mu murenge wa Rubavu bimwe mu bibazo bikibangamiye imibereho yabo.

Umuhango ukaba wahujwe no kurahiza abanyamuryango bashya 280 basanga 536 barahiye muri uyu mwaka wa 2022 no kumurika inzu yubakiwe utishoboye utaragiraga aho akinga umusaya, ndetse bashoboye no kuremera abanyamuryango batanu batishoboye borojwe ingurube n’abandi babiri bagabiwe inka.

Ibi Kambogo Ildephonse, yabigarutseho kuri uyu wa 11 ukuboza 2022, ubwo bizihizaga isabukuru y’imyaka 35 umuryango FRR Inkotanyi ushinzwe.

Ati “Ntitwabura gushima ibimaze gukorwa birimo ibikorwaremezo birimo kubakwa muri uyu murenge ndetse na gahunda bihariye y’ubukangurambaga bw’isuku ariko iterambere ry’uyu murenge riracyabangamiwe n’ibibazo birimo abacoracora bacuruza bitinjiriza Leta imisoro, abajura bagenda bakica abo bagiye kwiba.”

Kambogo kandi akomeza atunga agatoki ruswa no kubaka mu kajagari, gukubita no gukomeretsa, akaba asanga ibi bibazo byose babishyize ku murongo umurenge iterambere ryawo n’abanyamuryango ryakwihuta.

Kambogo asanga kuba umunyamuryango ari ukuba umunyakuri mubyo ukora byose.

Kuri Harerimana E. Blaise, Gitifu w’uyu murenge avuga ko icyo bishimira ari uko ibibazo bibangamiye imibereho y’abawutuye ibyinshi bamaze kubimenya.

Ati “Ntabwo wakemura ikibazo utarakimenya, ariko twebwe turishimira ko twakimenye kandi tugiye kubegera turebera hamwe ibyo bakorera hano batagiye gushakira ubuzima hakurya, twaratangiye kandi hari abamaze kwibumbira mu ma koperative tubafasha kwiteza imbere, aho tumaze gufasha amatsinda agera ku 8 yahisemo kubaho atari uko yambutse umupaka.”

Mu bibazo bigaragazwa n’abanyamuryango ba FPR Inkotanyi muri uyu murenge bakeneye ko byakorerwa uvugizi harimo Ibigo nderabuzima n’ibiro by’utugari bitarasanwa ndetse bavuga ko bakeneye poste mu kagari ka Gikombe.

Hari n’abavuga ko ibibazo birimo ubucoracora bishingira ku miterere y’uyu murenge uhana imbibi na RDC kandi ifite imiyoborere itandukanye niy’u Rwanda, hari no kuba hari abari basanzwe bashakira amaramuko muri icyo gihugu batakibasha kwambuka kubera ubushobozi byiyongera mu bitiza umurindi ibi bibazo.

Ku kibazo cy’abakora ubucuruzi butemewe bwambukiranya umupaka, imibare ivuga ko muri uyu murenge wa Rubavu byibura mu cyumweru hafatwa abantu batatu bambukije magendu bayivana mu gihugu cy’abaturanyi cya Repubulika iharanira demukarasi ya Congo.

Kambogo Ildephonse, Chairman w’umuryango mu karere ka Rubavu (hagati) yatungiye agatoki abanyamuryango ba FPR Inkotanyi mu murenge wa Rubavu bimwe mu bibazo bikibangamiye imibereho yabo
Abiganjemo urubyiruko barenga 200 barahiriye kuba abanyamuryango

Subiza ku gitekerezo

Your email address will not be published. Required fields are marked *