Rutsiro: Ubuyobozi bwemeye ko bwasenye amazu 5 akiri mazima ku impamvu zitunguranye

Nyuma yo kubazwa ibibazo birebana n’amazu ya RAB aherutse gusenywa, Umuyobozi w’akarere ka Rutsiro yemereye inama njyanama ko aya mazu yari akiri mazima usibye igisenge batari gusakara mu minsi ibiri gusa kubera ko nyakubaha perezida a Repubulika yari buhanyure muri iyo minsi bahitamo kuyasenya.

Ibi yabigarutseho kuri uyu wa gatanu, tariki 02 ukuboza 2022, mu nama njyanama idasanzwe yateranye muri aka karere.

Murekatete Triphose, Umuyobozi w’akarere ka Rutsiro kuby’isenywa ry’aya mazu yavuze ko yari akiri mazima.

Ati “Amazu yasenywe bitewe n’amabwiriza runaka twari twakiriye ntiyakabaye ateza ikibazo, kandi hari naho mujya mubona bakora umuhanda ukarara wuzuye, niba mwarabibonye ku mafoto ariya mazu isakaro ryayo ryasaga nabi ariko hasi zari inzu zikomeye.”

Akomeza agira ati “RAB yaduhaye uburenganzira bwo kuyasenya nta nubwo byasabye inyandiko kuko byaje mu buryo bwihuse ahita asenywa ndetse amazu yasigaye kuri ubu dushobora guhindura igisenge agakoreshwa ibindi bikorwa.”

Murekatete Triphose, Umuyobozi w’akarere ka Rutsiro akomeza avuga ko byari bigoye gusakara igisenge mu minsi ibiri bahitamo gusenya.

Nk’uko twabibagejejeho mu nkuru yabanje abaturage baturiye aya mazu bavuga ko banze kuyasenya mu buryo bw’umuganda kuko babonaga akiri mazima.

Amakuru Rwandanews24 ifite n’uko ariya mazu yasenywe yahoze ari aya bazungu b’aba Suwisi akaba yarahawe RAB nyuma ya Jenoside yakorewe Abatutsi muri Mata 1994.

Ibi umuyobozi w’akarere yabyemereye inama njyanama nyuma yo kugaragaza ko bafite imiryango myinshi yarokotse jenoside yakorewe Abatutsi irenga 300 itagira aho ikinga umusaya hibazwa nimba nka ziriya nzu zitari kuba zaratunganyijwe zigatuzwamo imiryango imwe n’imwe ibabaye kurusha indi.

Ikindi cyagarutsweho ni ukwibaza niba amazu 4 yasigaye nta kindi yakoreshwa, bamwe mubagize njyanama batangaga ibitekerezo by’uko bashyiramo ishuri rya TVET ryigisha imyuga y’ubuhinzi n’ubworozi, dore ko ahaherereye aya mazu hari n’ubutaka burenga Ha 21 bwa kwifashishwa mu bushakashatsi ndete no gushyira mu bikorwa amasomo baba bize.

Isenywa ry’aya mazu rifitanye isano n’uruzinduko rw’Umukuru w’Igihugu

Murekatete Triphose, Umuyobozi w’akarere ka Rutsiro mu nama njyanama y’akarere yavuze ko ariya mazu isakaro ryayo ryari riteje umwanda kandi bitegura uruzinduko rw’Umukuru w’Igihugu.

Rwandanews24 mu ibaruwa ifitiye kopi yandikiwe Bisangabagabo Sylvestre, wayoboraga umurenge wa Mukura uherereyemo aya mazu ku gice cya Rutsiro igaragaza ko yashinjwe intege nke mu isenywa ry’aya mazu kuko abaturage banze kuyasenya bigasaba ko hiyambazwa abacancuro nabo bishyuwe na rwiyemezamirimo ndete n’uwasenyeheje akaba atarishyurwa.

Nyuma y’uko ubuyobozi bw’intara na RAB bubonye ko aya mazu yari asakaje amategura atigeze yitabwaho, kandi yegereye umuhanda Perezida wa Repubulika yagombaga kunyuraho aturutse mu karere ka Karongi bahisemo kuyasenya ngo batabazwa impamvu atitaweho.

Ku ruhande rw’akarere ka Karongi hasenywe amazu 4 yari ahasanzwe, naho ku ruhande rwa Rutsiro hasenywa amazu 5 mu mazu 9 yari ahari.

Mu nama y’umuryango wa FPR Inkotanyi, Umukuru w’Igihugu yumvikanye yihanangiriza abayobozi bamukurikira aho agiye avuga ko nta porotocole akeneye.

Umukuru w’Igihugu kandi yumvikanye yihanangiriza abayobozi bakora isuku (gukubura) ari uko ari bubasure, abasaba ko bakabaye barayikoze mbere kandi ihoraho.

Akarere ntikavuga rumwe ku isenywa ry’aya mazu na Guverineri na DG wa RAB

Kuba ubuyobozi bw’akarere ka Rutsiro buvuga ko hasenywe amazu mazima, bihabanye n’ibivugwa n’ubuyobozi bw’intara y’iburengerazuba ndetse na RAB.

Habitegeko François, Guverineri w’intara y’iburengerazuba we avuga ko nta mazu yasenywe ahubwo ko ari umwanda wakuweho nk’uko yabitangarije Rwandanews24.

Ati “Ibyo twasenye byari umwanda nta mazu yari ahari, wari umwanda twawukuyeho ahubwo se wambonera bimeze bite uyu munsi?”

Habitegeko avuga ko hari inzu zisanika n’iziba zaramaze kuba umwanda, kuko niba basaba abaturage gukuraho umwanda asanga Leta atariyo yakomeza gushyiraho umwanda.

Dr. Karangwa Patrick, Umuyobozi mukuru w’ikigo cy’Igihugu gihshinzwe guteza imbere ubuhinzi n’ubworozi RAB nawe ahamya ko amazu yasenywe atari yujuje ubuziranenge nk’uko yabitangarije Rwandanews24 ku murongo wa terefone.

Ati “Twakoze isesengura ry’amazu dufite mu gihugu hose, bikorwa n’ikigo kibifitiye ububasha aricyo Rwanda housing Authority (RHA) twifuzaga kurebera hamwe amazu dushobora kuvugurura akaba meza ni ayo twavugurura ikiguzi kikaba kinini kuruta uko twakubaka andi.”

Dr. Karangwa Patrick yakomeje avuga ko basanze ziriya nzu zigomba gukurwaho nyuma yo gukorerwa isesengura n’urwego rubifitiye ububasha ndetse ko n’ahandi bagifite amazu atajyanye n’igihe bazakomeza kuyasenya.

Ubwo aya mazu yasenywaga abaturage bagaragaje ko nta bushake bafite bwo kuyasenya, ibyatumye Umunyamabanga nshingwabikorwa w’uyu murenge yandikirwa ibaruwa asabwa gutanga ubusobanuro
Amazu yasenywe Umuyobozi w’akarere yemereye inama njyanama ko yari agikomeye

Subiza ku gitekerezo

Your email address will not be published. Required fields are marked *