Uganda: Abana batandatu bo mu muryango umwe banduye Ebola

Abategetsi bo mu murwa mukuru wa Uganda bavuga ko abana batandatu bo mu muryango umwe w’i Kampala banduye Ebola kandi ikigo cy’amashuri bigaho kikaba kidafunze.

Abakozi bo mu buvuzi bamaze ibyumweru basaba ko hashyirwaho ingamba zikaze kurushaho mu kwirinda ko iyi virusi ikwirakwira ikagera i Kampala.

Za virusi zishobora gukwirakwira byihuse cyane mu duce dutuwe n’abantu mu buryo bw’ubucucike kandi iyi Ebola yo muri ubu bwoko – yitwa Ebola yo muri Sudan – nta rukingo ifite kugeza ubu.

Muri uku kwezi kwa cumi, uturere tw’izingiro ry’iki kiza cya Ebola twa Mubende na Kassanda, twashyizwe mu kato.

Abategetsi bemeza ko abo bana batandatu bavukana banduye Ebola nyuma yuko mwenewabo (uwo bafitanye isano) aje kubana na bo avuye muri kamwe mu turere twibasiwe cyane, nyuma arapfa.

Kuva iki kiza cyatangira mu kwezi kwa cyenda, minisiteri y’ubuzima ya Uganda imaze kubarura abantu 109 banduye Ebola n’abantu 30 bishwe na yo. Kugeza ku wa mbere, 15 muri abo imaze kwica bari ab’i Kampala.

Bamwe bafite ubwoba ko Perezida Yoweri Museveni yatinze cyane kugira icyo akora ku kuburira kwa mbere kw’abakozi bo mu buvuzi kwo kuri iyi virusi.

Minisitiri w’ubuzima Jane Ruth Aceng avuga ko ahangayikishijwe cyane n’ubwandu bw’iyi virusi bwo mu duce two mu mijyi, aho abahatuye baba ari abantu bakora ingendo cyane bava mu gace kamwe bajya mu kandi.

BBC dukesha iyi nkuru yatangaje ko abo bana batandatu banduye Ebola bo mu murwa mukuru amazina yabo atatangajwe cyangwa ngo imyaka yabo itangazwe, mu kurinda imyirondoro yabo, ariko ikizwi ni uko amashuri aba bana bigaho atafunzwe.

Minisitiri Aceng avuga ko abakozi bo mu buvuzi batandatu banduye nyuma yo kwita ku barwayi, na bo bari mu bantu baherutse gupfa.

Kampala ni yo zingiro ry’ibikorwa by’ubukungu by’iki gihugu kandi mu gihe Ebola yaba ikwirakwiriye byihuse muri Kampala, hari ibyago byinshi ko iyi virusi yakwirakwira ikagera no mu bindi bihugu.

Subiza ku gitekerezo

Your email address will not be published. Required fields are marked *

Translate »