Imirwano ya FARDC na M23: Centre ya Ntamugenga muri Rutshuru yabaye isibaniro

Imirwano ‘ikomeye’ hagati y’ingabo za leta ya DR Congo (FARDC) n’inyeshyamba za M23 muri teritwari ya Rutshuru ku cyumweru yabereye muri centre ya Ntamugenga iri ku ntera iri munsi ya 15 km uvuye ku mujyi wa Rutshuru ari nawo ‘chef-lieu’ y’iyi teritwari.

Itangazo rya FARDC ryo ku cyumweru nijoro rivuga ko muri ako gace ka Ntamugenga “imirwano ikomeje” kandi ko “ibintu birimo kugenzurwa n’ingabo za leta ku ngamba zose”.

Ibiro ntaramakuru AFP byo bisubiramo umusirikare w’ingabo za leta witwa Colonel Mavinga Serge avuga ko inyeshyamba za M23 zafashe agace ka Ntamugenga.

Ikinyamakuru JeuneAfrique ku cyumweru nacyo cyavuze ko umukuru w’umudugudu muri Ntamugenga witwa Célestin Nyamugira yagize ati: “…M23 imaze gufata Ntamugenga”.

Ntamugenga ni agace kari kumuhanda mukuru uhuza umujyi wa Rutshuru n’umujyi wa Goma, mu ntara ya Kivu ya ruguru, hafatwa nk’agace k’ingenzi muri uru rugamba.

FARDC ivuga ko M23 yateye Ntamugenga kugira ngo ihagarike uburyo bwo kugeza ibikenerwa ku ngabo ziri ku rugamba muri Rutshuru. 

Itangazo rya FARDC rivuga kandi ko abasivile bane bapfuye naho abagera kuri 40 “barimo abana” bakomeretse aharimo kubera imirwano hatandukanye muri Rutshuru. 

Ishami rya ONU rishinzwe ibikorwa by’ubutabazi, OCHA, rivuga ko abantu bagera ku 23,000 bamaze guhunga iyi mirwano yatangiye kuwa kane, harimo abagera ku 2,500 bahungiye muri Uganda.

FARDC na M23, buri ruhande rushinja urundi kuba ari rwo rwatangije iyi mirwano. 

FARDC mu itangazo ryayo yongera kuvuga ko ari “ingabo z’u Rwanda zateye DR Congo zihishe muri M23”, ibi birego leta y’u Rwanda yagiye ibihakana.

OCHA ivuga ko kuva muri Werurwe 2022 abantu barenga 390,000 bavuye mu byabo kubera imirwano muri Rutshuru nk’uko BBC dukesha iyi nkuru yabitangaje.

Subiza ku gitekerezo

Your email address will not be published. Required fields are marked *

Translate »