Rubavu: Ubuyobozi bw’umurenge buravuga imyato abikorera

Ubuyobozi bw’Umurenge wa rubavu ho mu karere ka Rubavu buravuga imyato abikorera bo muri uyu murenge kubera uruhare rwabo mu kwesa imihigo.

Ibi babigarutseho mu nama nyunguranabitekerezo yiga ku iterambere ry’uyu murenge yabaye kuri uyu wa 07 Ukwakira 2022 yahuje inzego z’ubuyobozi n’abikorera babashimira uruhare rwabo mu iterambere.

Muri iyi nama kandi urwego rw’abikorera muri uyu murenge rwashimiwe uruhare rwagize mu gutuma uyu murenge ubasha kwigurira imodoka yo kubafasha gucunga umutekano no kugenzura isuku.

Ikindi bashimiwe ni uruhare bagize mu kuvana uyu murenge wari mu myanya yanyuma mu kwishyura ubwisungane mu kwivuza kuri ubu bakaba bageze ku kigero cyo hejuru ya 90%.

Harerimana Emmanuel Blaise, Umunyamabanga nshingwabikorwa w’umurenge wa Rubavu avuga ko iyi nama nyunguranabitekerezo yatekerejweho kugira ngo bisuzume barebe aho bava n’aho bajya mu mihigo binyuze mu ruhare rw’abafatanyabikorwa.

Ati “Twareberaga hamwe aho tumaze kuva n’aho tugana, ari nako dushimira abikorera bafatanyije n’abafatanyabikorwa ni bamwe mu bantu dufatanyije mu rugendo rw’iterambere rihindura imibereho myiza y’abaturage, badufashije kuzamura ubufasha duha urwego rw’irondo aho twiguriye imodoka yo kunganira umutekano, rero n’uyu munsi bafashije mu kuremera abatishoboye babishyurira ubwisungane mu kwivuza.”

Harerimana akomeza avuga ko ku bufatanye n’urwego rw’abikorera ndetse n’abandi bafatanyabikorwa imibereho y’abatuye umurenge wa Rubavu izarushaho kuba myiza, aho kuri ubu barimo gutekereza ku rugendo ruganisha kuvugurura umujyi w’umurenge wa Rubavu.

Harerimana Emmanuel Blaise, Umunyamabanga nshingwabikorwa w’umurenge wa Rubavu
Abikorera n’abafatanyabikorwa b’Umurenge wa Rubavu bitabiriye inama nyunguranabitekerezo

Subiza ku gitekerezo

Your email address will not be published. Required fields are marked *

Translate »