Rutsiro: Ikererwa ry’imirimo yo kubaka Gare ntirivugwaho rumwe

Nyuma y’uko muri Mutarama 2022 Ubuyobozi bw’Akarere ka Rutsiro butangaje ko imirimo yo kubaka Gare ya Rutsiro itazarenza Kamena itaratangira none bigeze muri Nzeri nta n’umwe uramenya igihe iyi mirimo izatangirira.

Ibi byatangajwe nyuma y’uko urwego rw’abikorera bo muri aka karere batunzwe agatoki inshuro nyinshi ko nta bikorwa rusange bakora byunganira akarere kandi bibyara inyungu.

Gare abanya-Rutsiro bamaze imyaka myinshi bayitegereje kuko muri 2016, imirimo yo kuyubaka yatangijwe n’uwari umuyobozi w’akarere maze hazanwa imashini z’abashinwa ziratengagura ariko ntizamazemo kabiri imirimo igahita ihagarara ku mpamvu zitamenyekanye.

Ikaba izubakwa mu murenge wa Gihango, Akagari ka Congo Nil, mu mudugudu wa Nduba, mu Centre y’ubucuruzi ya Congo Nil.

Gare ya Rutsiro izubakwa ku buso bwa Metero kare zirenga ibihumbi 3

Kuri uyu wa 22 Nzeri 2022 umunyamakuru wa Rwandanews24 wavuganye n’uhagarariye urugaga rw’abikorera muri aka karere ndetse n’ubuyobozi bw’Akarere ababaza impamvu yadindije imirimo y’iyubakwa ry’iyi Gare maze Ubuyobozi bw’akarere buvuga ko umuturage wari uhafite ubutaka hashize ibyumweru bibiri ikibazo cye gikemutse, mu gihe ubuyobozi bw’urugaga rw’abikorera ruvuga ko ikibazo cy’uyu muturage kitarakemuka.

Havugimana Etienne, Umuyobozi wungirije w’Akarere ka Rutsiro ushinzwe iterambere ry’ubukungu, yabwiye RWANDANEWS24 ko iyi gare izatangira kubakwa vuba aha ariko bataramenya igihe kuko hari ibikenewe kunozwa.

Ati “Impamvu imirimo yo kubaka gare yatinze, umuturage ufite ubutaka ahazubakwa gare tuzaha ingurane twari twizeye ko bizihuta ariko kubera bisaba kunyura muri Minisiteri y’ibidukikije byaratinze gato ariko kuri ubu ikibazo kimaze ibyumweru bibiri gikemutse, tugiye gutangira umushinga w’ibikorwa bijyanye no kubaka Gare bitangire vuba, kandi abikorera bafite ubushake n’ubushobozi.”

Havugimana akomeza avuga ko Gare ya Rutsiro izubakwa n’abikorera ariko bakagirana amasezerano n’akarere kuko ariko katanze amafaranga y’ingurane.

Habyarimana Jean Baptiste, Umuyobozi w’urugaga rw’abikorera mu karere ka Rutsiro avuga ko abikorera biteguye inzitizi z’ikiri mu karere kuko katarabasha kubona icyangombwa cy’ubutaka kishyuye buzubakwaho Gare.

Ati “Abikorera bazubaka gare bibumbiye muri (Rutsiro investment Company Ltd) bariteguye ariko ikibazo cyo kwishyura umuturage ufitemo ubutaka ntikirarangira, kandi bizakorwa n’akarere, ubwo nikamara kurangiza kazafata ibyangombwa by’ubutaka bitandukanye kishyuye abaturage kabihuze havemo icyangombwa kimwe ariko amakuru dufite n’uko akarere kenda guhabwa amakuru kakemererwa kwishyura uwo muturage.”

Habyarimana akomeza avuga ko abikorera biteguye kuko ubushake n’ubushobozi bihari ahubwo bakomeza gutinzwa no kuba akarere katarabasha kubona icyangombwa cy’ubutaka buzubakwaho gare, agasezeranya abaturage ko nikiboneka imirimo yo kubaka itazatinda.

Ubutaka iyi gare izubakwaho bufite agaciro ka miliyoni 70 Frw. Ku ikubitiro byari biteganyijwe ko iyi gare izubakwa n’akarere, ariko nyuma byaje guhinduka hanzurwa ko izubakwa n’abikorera.

Abikorera bibumbiye muri Rutsiro Investment Company Ltd bagiye guhabwa imirimo yo kubaka Gare ya Rutsiro igizwe ni abanyamuryango 15 ndetse bakaba bagitanga ikaze no kubandi banyamuryango bafite ubushake bwo kwifatanya nabo aho umugabane muto w’uwifuza gushora imari asabwa Miliyoni 10 Frw, ikaba igiye kubaka Gare ifite agaciro kabarirwa zisaga Miliyoni 200 Frw.

Iyi Kampani ya Rutsiro Investment Company Ltd yari yarafunguwe nyuma ikaza gufungishwa ku mpamvu zitamenyekanye, abari bayibumbiyemo bikabaviramo igihombo igiye kongera gufungurwa n’abiyemeje gushorimari mu mirimo yo kubaka iyi Gare ya Rutsiro.

Gare ya Rutsiro biteganyijwe ko izaba ifitemo imiryango 26 y’ubucuruzi

Please Post Your Comments & Reviews

Your email address will not be published. Required fields are marked *