DRC: Umwuka w’ubwoba mu mujyi wa Bunia

Inyeshyamba za Coopérative pour le développement du Congo (CODECO) na Force Patriotique et Intégrationniste du Congo (FPIC) zasatiriye umujyi wa Bunia, umurwa mukuru w’intara ya Ituri mu burasirazuba bwa DR Congo, nk’uko abahatuye babivuga.

Kuwa mbere, umunyamakuru wa Radio yigenga ikorera i Bunia yabwiye BBC ko muri uwo mujyi hari umwuka w’ubwoba mu gihe izo nyeshyamba zigaruriye uduce tw’inkengero zawo.

BBC yagerageje kuvugana n’abategetsi muri iyi ntara ariko kugeza ubu ntibirashoboka.

Radio Okapi iterwa inkunga na ONU ivuga ko inyeshyamba za CODECO zashinze ibirindiro ahitwa Ezekere muri 10Km uvuye i Bunia naho iza FPIC kuwa gatandatu zageze ahitwa Lengabo muri 5KM uvuye muri uyu mujyi.

Iyi radio ivuga ko ibi byateye ubwoba abaturage ndetse bamwe bamaze guhunga uyu mujyi usanzwe ubamo abaturage hafi miliyoni imwe. 

Uyu munyamakuru wo muri uyu mujyi utifuje gutangazwa yabwiye BBC Gahuzamiryango ko bamwe mu barwanyi b’izi nyeshyamba “baracengeye muri uyu mujyi” kandi kubivugaho bisanzuye bishobora kubashyira mu kaga.

Ati: “Njyewe n’abandi banyamakuru babiri twatewe ubwoba. Ntabwo ibintu bimeze neza.”

Radio Okapi ivuga ko umukuru wa polisi muri uyu mujyi wa Bunia avuga ko umutekano ucunzwe neza agasaba abantu kujya mu mirimo yabo bisanzuye. 

Izi nyeshyamba zongereye ibikorwa byazo hafi ya Bunia mu minsi micye ishize, nubwo ingabo za leta zagerageje kuzirwanya, nk’uko radio Okapi ibivuga.

Mu mezi ya Gashyantare(2), Werurwe(3) na Mata(4) 2022 na mbere yaho, inyeshyamba za CODECO zashinjwe ibikorwa by’ubwicanyi bw’indengakamere ku basivire muri iyi ntara ya Ituri.

Muri Kamena(6) uyu mutwe – uvuga ko urengera abo mu bwoko bw’aba Lendu – wagiranye amasezerano na leta ya gisirikare ya Ituri wemera gushyira intwaro hasi no guhagarika ubugizi bwa nabi. 

Ariko kuva mu kwezi gushize wongeye kumvikana ushinjwa ubwicanyi mu bice by’iyi ntara ya Ituri.

Nta cyo uratangaza ku mugaragaro kuri ibyo ushinjwa.

Intara za Kivu ya ruguru na Ituri zimaze umwaka urenga ziri mu bihe bidasanzwe by’ubutegetsi bwa gisirikare bwahawe uburenganzira bwo gukoresha ingufu zose mu guhiga no kurandura imitwe yitwaje intwaro.

Abasesenguzi bamwe bavuga ko ingabo za DR Congo zananiwe iki kibazo kuko imitwe yitwaje intwaro ikomeje kwimonogoza muri izi ntara zombi.

Please Post Your Comments & Reviews

Your email address will not be published. Required fields are marked *