Abantu 22 barimo abasivili 13 n’abarwanyi umunani biciwe mu mirwano y’iminsi ibiri yahuje ingabo za Repubulika Iharanira Demokarasi ya Congo (FARDC) n’umutwe wa CODECO, ahitwa Mongwalu mu ntara ya Ituri.
Imirwano yabaye ku itariki 30 n’iya 31 Kanama 2022, mu mujyi wa Mongwalu uzwiho ubutunzi bwinshi bw’amabuye y’agaciro.
Abasivili bishwe ni abacukura zahabu mu gihe abandi bane bakomerekeye mu mirwano. FARDC kandi yishe abarwanyi umunani ba CODECO barimo umuyobozi w’urugamba rwabo mu gihe abandi barwanyi 11 bakomeretse.
Ku ruhande rw’ingabo za FARDC, batangaje ko hishwe umusirikare umwe. Habarurwa kandi inzu z’ubucuruzi n’izo kubamo 60 zatwitswe.
Kuri ubu komini ya Mongwalu iragenzurwa na FARDC guhera ku wa Gatatu nijoro.
Nyuma y’iyi mirwano, abarwanyi ba CODECO bavuye mu birindiro bya Brésil, Digene na Mbau.
