DRC yatangaje ko Ebola yaba yahitanye umuntu

Umuntu utatangajwe umwirondoro wapfuye ku wa mbere taliki ya 15 Kanama 2022 mu ntara ya Kivu ya Ruguru ya DR Congo birakekwa ko yishwe na virus ya Ebola, nk’uko abategetsi muri iki gihugu babitangaje.

Muri iki cyumweru hari amakuru – ataremejwe – yavugaga ko muri ako gace haba habonetse umuntu wanduye Ebola.

Patrick Muyaya, umuvugizi wa guverinoma ya DR Congo yatangaje ko mu nama ya guverinoma yabaye muri iki cyumweru Minisitiri w’ubuzima – Jean-Jacques Bungani Mbanda – yayimenyesheje urupfu rw’uwo muntu bikekwaho ko yishwe na Ebola.

Yagize ati: “Yabwiye iyo nama ko…by’umwihariko hari kuba iperereza ryimbitse ry’ikipe ibishinzwe mu karere ka Beni, harimo urutonde rw’abo bahuye, gutera imiti irwanya udukoko ku bitaro no mu ngo, n’ububiko bw’inkingo z’iki cyorezo bukaba buhari muri iyi ntara.”

Muyaya yavuze ko mu gihe hategerejwe ko byemezwa niba koko hari Ebola muri ako gace, leta isaba abaturage kwigengesera.

Ebola iheruka kuvugwa muri DR Congo mu kwezi kwa Mata(4) uyu mwaka, yishe abantu babiri mu gace ka Mbandaka mu burengerazuba, ntabwo yakwiriye ahandi mu gihugu.

Ebola yibasiye DR Congo kuva muri Kanama(8) 2018 igeza mu 2020 ni yo yabaye iya kabiri ikaze cyane ku isi, abantu barenga 3,400 barayanduye, naho abarenga 2,200 irabica.

Iyadutse muri Afurika y’uburengerazuba mu 2013 ni yo ya mbere yahitanye benshi ku isi kugeza ubu, 11,000.

Iyi ndwara yica ku kigero kigera kuri 50% cy’abayirwaye.

Ebola ni iki?

  • Mu 1976, ni bwo yagaragaye bwa mbere ku isi, mu cyaro cya Yambuku, mu majyaruguru ashyira uburengerazuba bwa DR Congo
  • Ni virus ibanza gutera umuntu guhinda umuriro vuba, gucika intege bikomeye, kuribwa ingingo no kubabara mu muhogo
  • Hakurikiraho kuruka, guhitwa no kuvira imbere n’inyuma
  • Abantu bayanduzwa n’amatembabuzi ayo ari yo yose y’umuntu wayanduye
  • Abayirwaye kenshi bicwa n’umwuma, n’ingingo z’imbere mu mubiri zangirika ari nyinshi

Please Post Your Comments & Reviews

Your email address will not be published. Required fields are marked *