Rutsiro: Umusaza Bajyagahe yasanzwe mu ishyamba yapfuye

Mu gitondo cyo kuri uyu wa 14 Kanama 2022 mu karere ka Rutsiro nibwo hamenyekanye urupfu rwa Bajyagahe Eliezer uri mu kigero cy’imyaka 60 wasanzwe mu ishyamba yapfuye.

Bajyagahe Eliezer, umurambo we wasanzwe mu ishyamba ry’uwitwa Barera riherereye mu murenge wa Murunda, akagari ka Twabugezi ho mu mudugudu wa Rwanika.

Umuturage wari muri iri shyamba basanzwemo umurambo wa Bajyagahe mu kiganiro kuri terefone yatangarije Rwandanews24 ko umurambo w’uyu musaza wabonwe n’umuturage wari ugiye kwahira.

Ati “Umurambo wa nyakwigendera wabonwe n’umuntu wari ugiye kwahira ubwatsi mu masaha ashyira saa kumi n’ebyiri n’igice z’igitondo, ari nawe watabaje, duhagaze kure y’aho umurambo uri mu gihe tugitereje inzego zishinzwe gukora iperereza. Ibintu by’impfu nk’izi ntitwari tuzimenyereye ari nayo mpamvu abaturage bacitse igikuba.”

Icyizihiza Alda, Umunyamabanga nshingwabikorwa w’umurenge wa Murunda yatangarije Rwandanews24 ko urupfu rw’uyu musaza rwamenyekanye muri iki gitondo ariko ucyamwishe kikaba kitaramenyekana.

Ati “Amakuru yamenyekanye mu gitondo, ubwo mutwarasibo yari ahanyuze amusanga yapfuye, icyamwishe ntikiramenyekana mu gihe iperereza rigikomeje.”

Icyizihiza yakomeje avuga ko bategereje ko Urwego rw’Igihugu rw’Ubugenzacyaha RIB ruza gukora iperereza, umurambo ukabona gushyikirizwa ibitaro bya Murunda kugira ngo ukorerwe isuzuma mbere y’uko ushyingurwa.

Ubwo twakoraga iyi nkuru abakozi b’Urwego rw’Igihugu rw’Ubugenzacyaha RIB bari bataragera aho uyu murambo wa nyakwigendera uherereye ngo babanze gukora iperereza ku cyaba cyamwishe.

Ibiro by’Akarere ka Rutsiro

Please Post Your Comments & Reviews

Your email address will not be published. Required fields are marked *