Rutsiro: Bimwe mu bibazo byagaragaraga mu bitaro bya Murunda byavugutiwe umuti

Umunyamabanga wa Leta muri Minisiteri y’ubuzima (MINISANTE) Dr. Col. Mpunga Tharcisse mu ruzinduko yagiriye mu karere ka Rutsiro kuri uyu wa mbere, tariki 08 Kanama 2022 yavugutiye umuti bimwe mu bibazo yasanze mu bitaro bya Murunda, ndetse anakomoza kuri Niyonkuru Salomon wari ushinzwe imari n’ubutegetsi washinjwe gukora uburiganya bwo guhombya no kurigisa umutungo w’ibitaro.

Bamwe mu baganga bo muri ibi bitaro baganiriye na Rwandanews24 bakifuza ko imyirondoro yabo igirwa ibanga bavuga ko bishimiye kuba bahawe umuyobozi mushyashya ndetse agahabwa inshingano zo gukemura byihutirwa ibibazo yasanze muri ibi bitaro.

Ati “Twari twarahazahariye kuko itonesha n’itoteza ryari riturambiye, aho abakozi bahoraga mu mahugurwa bari bamwe gusa batajya bahinduka, ariko bakimara gusaba DAF kuzaba yamaze gusezera akazi mu cyumweru kimwe twishimye cyane, Minisitiri yabivugaga yarakaye cyane natwe tukabona ko Igihugu kidukunda kandi kibabazwa no kuba twari tubayeho nabi. Twishimiye kandi Umuyobozi mushya w’ibitaro twahawe kuko yeretswe ishusho ibisanzwemo agasabwa gukemura ibibazo byose birimo.”

Mu bibazo bindi byakojejweho umwotso harimo ikibazo cyo kuba uyu mukozi wari ushinzwe ubutegetsi n’imari yaragize uruhare mu kwiba amafararanga ubwo habaga amahugurwa mu karere ka Rubavu abantu bamwe bagahabwa amafaranga nyamara batarigeze bayitabira.

Rwandanews24 twagerageje kuvugisha Niyonkuru Salomon ntibyadukundira kuko terefone ye umunsi wose yari yayikuyeho, gusa amakuru ataragira urwego na rumwe ruyemeza aravuga ko uyu mugabo yaba yamaze gutoroka ahunga ubutabera.

Murekatete Triphose, Umuyobozi w’akarere ka Rutsiro avuga ko mu bitaro bya murunda basanzemo ibibazo by’ingutu birimo kuba abakozi babyo badahagije, akemeza ko basabye umuyobozi mushya gufata abakozi kimwe atarobanura.

Ati “Ibibazo by’ingutu byari bibangamiye abakozi mu bitaro bya Murunda twahasanze byose byahawe umurongo aho ibirimo kongererwa abakozi imyanya yasizwe ku isoko harihutishwa ibizamini ngo hazibwe icyuho.”

Ku kibazo cyo kuba nimba abakozi bagaragaweho n’ingeso mbi yo kwigwizaho umutungo no gukoresha nabi umutungo wa leta nabi bashobora kugezwa imbere y’ubutabera yadusubije ko uwo byagaragaraho wese atahishirwa.

Ati “Nibyo uwagaragaraho imicungire mibi wese yashyikirizwa ubutabera.”

Ku butumwa umuyobozi w’akarere yageneye umuyobozi mushya w’ibitaro bya Murunda, yavuze ko bamusabye kutarangwa n’itonesha agafata abakozi kimwe. 

Ati “Umuyobozi mushya yasabwe gufata abakozi bose kimwe buri wese agahabwa uburenganzira yemererwa n’amategeko, ikindi nuko abakozi bakwiye kuyobora neza hubahirizwa amategeko agenga abakozi ba leta, abakozi barasabwa gukora neza akazi, bakanyurwa n’ibihembo birinda gusaruha ibyagenewe kuvana abaturage mu bukene, bahararanira kuba inyangamugayo, bakanitangira akazi.”

Baharanire gushyira umuturage kw’isonga, bareba inyungu rusange aho kwirebaho gusa, ikindi birinde umuco mubi wo gushyigikirana mu makosa.

Please Post Your Comments & Reviews

Your email address will not be published. Required fields are marked *