Rubavu: Ikibazo cy’ubwiherero cyabaye ingorabahizi, CAR FREE ZONE yasubitswe

Ubuyobozi bw’Akarere ka Rubavu bwatangarije Rwandanews24 ko mu mpamvu nyamukuru zatumye CAR FREE ZONE yari yatangijwe mu cyumweru gishize itakomeje muri iyi wikendi harimo impamvu zo kuba bamwe mu bayitabiriye baraburaga ubwiherero bukirimo gushakirwa aho bwaterekwa.

Ibi umuyobozi w’Akarere ka Rubavu yabitangarije Rwandanews24 nyuma y’uko hari bamwe mu bikorera bari badusabye ku babariza ubuyobozi impamvu bwabatunguje ko muri iyi wikendi igikorwa cyari cyatangijwe mu cyumweru gishize cya CAR FREE ZONE kitagikomeje, kandi bari bamaze koherereza amatike abakozi baza kubafasha gutanga serivisi zinyuranye baturutse impande n’impande mu buryo bwo kwitegura.

Kambogo Ildephonse, Umuyobozi w’akarere ka Rubavu yashimiye abikorera uburyo ki bakiriye impinduka zibatuguye, abasezeranya ko iyi gahunda idasubitswe burundu ahubwo hari ibikiri kubanza kunozwa.

Ati “Hari bimwe mu byagombaga kwitabwaho tugendeye kubyo abitabiriye CAR FREE ZONE yabanje batugejejeho, aho ubwiherero bwabaye ikibazo gikomeye cyane kuri ubu tukaba turimo gushaka ahantu tubushira, habaye ikibazo cy’abarwayi babangamiwe bari kwa muganga (Kwa Nyirinkwaya) ku buryo kuri ubu turimo gusuzuma inzira zindi twakoresha, ikindi nuko hari izindi gahunda z’imikino ku buryo byari bigoye kubona inzego z’umutekano zagombaga kudufasha mugucungira umutekano abagombaga kwitabira iki gikorwa akaba ariyo mpamvu iyi wikendi cyasubitswe.”

Kambogo akomeza avuga ko iyi gahunda kuba yasubitswe abari bayiteze bakwiriye kwihangana kuko izakomeza kandi ikazajya ishingira ku bihe abikorera bumvikanye n’ubuyobozi kandi bitagize izindi gahunda zisanzwe bibangamira.

Kambogo yaboneyeho gushimira abikorera buryo ki babashije kwihanganira kwakira izi mpinduka akabasezeranya ko kuri ubu bagiye kubitegura bakabiha umurongo ibikorwa byose bikaba iby’abikorera, kugira ngo birusheho kunozwa.

Bamwe mu bikorera bavuga ko bahombejwe no kuba igikorwa cyasubitswe ku munota wa nyuma.

Umwe yagize ati “Twamenyeshejwe ko igikorwa gisubitswe kuri uyu wa kane mu masaha y’ijoro, twari twamaze koherereza amafaranga y’amatike abakozi bagombaga kuva i Kigali ngo baze badufashe mu kurushaho gutanga serivisi inoze, icyo murumva ko ari igihombo.”

Undi ati “Twari twiteguye, kandi abakozi twagombaga kuzakoresha bamwe bari bahageze, bacumbikiwe kandi bishyuwe bivuze ko kutamenyeshwa mbere twebwe nk’abikorera byatugizeho ingaruka.”

CAR FREE ZONE mu karere ka Rubavu yatangiye kuwa 15 Nyakanga 2022, aho abanya Gisenyi bari bayinezerewe ariko kuri ubu abenshi bageraga aho yari yabereye ubushize bagasanga umujyi urera, bagahita bikomereza kuryohereza ku mahumbezi y’ikiyaga cya Kivu.

Inkuru yabanje: Rubavu: Ubuyobozi bwamenyesheje ahazajya habera “CAR FREE ZONE”

Abanya Gisenyi muri wikendi ishize bari bizihe na CAR FREE ZONE dore ko n’iyonka wabonaga yizihiwe

Subiza ku gitekerezo

Your email address will not be published. Required fields are marked *

Translate »