Kigali: Imodoka yacitse feri igonga abantu 4 muri bo 2 bahita bitaba Imana

Imodoka itwara imizigo yacitse feri igeze mu Kagari ka Kibagabaga, Umurenge wa Kimironko mu Karere ka Gasabo, igonga abamotari bane, babiri bahita bitaba Imana.

Iyi mpanuka yabaye ahagana saa Yine n’Igice kuri uyu wa Kane, tariki 21 Nyakanga 2022.

Iyo modoka yari itwaye amabati bivugwa ko yacitse feri irimo kumanuka ituruka mu bice byo ku Bitaro bya Kibagabaga, igonga abantu igeze hasi mu muhanda uva i Kinyinya ugana mu Kabuga ka Nyarutarama.

Bamwe mu babonye iyi mpanuka bavuga ko abamotari yagonze bose bashobora gupfa.

Uwitwa Bizimana Alain yagize ati “Twabonye imanuka yiruka turahunga, ihita igonga abamotari bane bari bahagaze aha ibajya hejuru.”

Biziyaremye Emmanuel we yagize ati “Ntakubeshye muri bose nta n’umwe uri burokoke bitewe n’uko nabonaga abo bandi bari bameze.”

Abatuye muri aka gace n’abahakorera bavuga ko inzego zibishinzwe zikwiye kugira icyo zikora kugira ngo zikumire impanuka zihabera kuko atari ubwa mbere imodoka icika feri igahitana abantu barenze umwe nk’uko Igihe dukesha iyi nkuru cyabyanditse.

Please Post Your Comments & Reviews

Your email address will not be published. Required fields are marked *