Kigali: Umunyamakuru wa Televiziyo yatawe muri yombi akekwaho ubujura

Umunyamakuru wa televiziyo yo mu Mujyi wa Kigali yatawe muri yombi n’Urwego rw’Igihugu rw’Ubugenzacyaha (RIB) akurikiranyweho icyaha cyo kunyereza umutungo n’icy’ubuhemu.

Uyu munyamakuru yatawe muri yombi ku wa 13 Nyakanga 2022. Amakuru y’ibanze yavugaga ko yanyereje ibikoresho bitandukanye bya televiziyo yakoreraga ariko akaza kuyivaho.

Umuvugizi wa RIB, Dr Murangira Thierry, avuga ko uyu munyamakuru yafashwe ndetse yakozweho iperereza.

Yagize ati “Mu byo akurikiranyweho kwiba harimo ibikoresho bitandukanye birimo za camera, byose bifite agaciro ka 7.500.000 Frw.’’

Yasobanuye ko ibi byaha akurikiranyweho yabikoreye mu Karere ka Kicukiro, Umurenge wa Gikondo, Akagari ka Kagunga, Umudugudu wa Rebero ku wa 6 Gashyantare 2022.

Kuva icyo gihe iperereza ryaratangiye, akurikiranwa adafunze dosiye ye ishyikirizwa Ubushinjacyaha ku wa 25 Mata 2022.

Dr Murangira yavuze ko uyu munyamakuru yatawe muri yombi ku wa 13 Nyakanga 2022 ndetse ahita afungirwa Sitasiyo ya RIB i Gikondo.

Umuvugizi wa RIB, Dr Murangira, yibukije abaturarwanda ko bakwiye kwirinda gukora ibi byaha kuko bihanwa n’amategeko.

Yakomeje ati “RIB iributsa abaturarwanda ko itazihanganira uwo ari we wese ukora ibyaha nk’ibi birimo icyo kunyereza umutungo ashinzwe kugenzura, awukoresha mu nyungu ze bwite ndetse n’icyaha cy’ubuhemu.’’

Uyu munyamakuru aramutse ahamijwe ibyaha akurikiranyweho yahabwa ibihano bitandukanye.

Icyaha cyo kunyereza umutungo gihanwa n’ingingo ya 10 y’itegeko N°54/2018 ryo ku wa 13/08/2018 ryerekeye kurwanya ruswa, gihanishwa igifungo kitari munsi y’imyaka irindwi ariko kitarenze imyaka 10 n’amafaranga y’u Rwanda yikubye inshuro eshatu kugeza kuri eshanu agaciro k’umutungo yanyereje.

Ku cy’ubuhemu, aramutse agihamijwe yahanishwa ingingo y’176 y’Itegeko No 68/2018 ryo ku wa 30/08/2018 riteganya ibyaha n’ibihano muri rusange, riteganya igifungo kitari munsi y’imyaka itatu ariko kitarenze imyaka itanu, n’amafaranga y’u Rwanda atari munsi y’ibihumbi 500 ariko atarenze miliyoni 1 Frw.

IGIHE

Subiza ku gitekerezo

Your email address will not be published. Required fields are marked *

Translate »