Kubungabunga ikiyaga cya Cyohoha byahinduriye ubuzima abagore b’ I Bugesera

Abagore bibumbiye mu itsinda ribungabunga ikiyaga cya Cyohoha bavuga ko byabahinduriye ubuzima kuko byatumye bikura mu bukene ubu bakaba babayeho neza n’imiryabo nyuma yo kwigishwa n’Ikigo cy’Igihugu cyita ku bidukikije (REMA) bagahindura imyumvire bakareka guhinga mu kiyaga nk’uko babibwiye Rwandanews24.

Uwimana Cynthia ni umwe mu bagore bibumbiye mu itsinda ribungabunga ikiyaga cya Cyohoha. Avuga ko imyumvire yabo yahindutse ubu bakaba babungabunga ikiyaga babishyizeho umwete.

Ibyatsi byitwa urufunzo abagore babikura mu kiyaga cya Cyohoha bakirinda kuzongera gukama nk’uko cyakamye mu myaka ya za 2000

Ati: “Kubera izuba ryakunze kwibasira akarere kacu (Bugesera), mu myaka ya za 2000 ikiyaga cyarakamye amazi ashiramo tukajya duhingamo urutoki, ibishyimbo, amateke n’imyumbati. Ariko mu mwaka muri 2016 REMA yatangiye kutwigisha uko twahinga imusozi tukareka guhinga mu kiyaga, batangira gutera imigano ku nkengero z’ikiyaga.”

Akomeza avuga ko abagore bahingaga mu kiyaga bakoze itsinda biyemeza kubungabunga ikiyaga cya Cyohoha banafashwa kujya babyaza umusaruro urufunzo bakuramo ari narwo rugira uruhare mu gukamyamo amazi.

Ati: “Batwigishije gukora pipinyeri no gutubura imbuto z’ibiti byo gutera. Urufunzo dukura mu kiyaga turubohamo isakaro ryo gutwikiriza ingemwe kugirango ziticwa n’izuba zikuma.”

Inyungu bakesha kubungabunga ikiyaga cya Cyohoha

Aba bagore babwiye Rwandanews24 ko uretse kuba barigishijwe gutubura ibiti muri pipinyeri, ubu n’imibereho yabo mu muryango yahindutse.

Mukandanga Epiphanie ni umwe muri bo. Ati: “Iyo imyumvire ihindutse n’imibereho irahinduka. Mbere yo kujya mu itsinda ryo kubungabunga ikiyaga cya Cyohoha nari umugore ugira ipfunwe ryo kujya mu bandi kubera ko ntagiraga umwenda mwiza wo kuzindukana, narakarabaga ariko ukabona gucya ntabyo ndetse n’abana banjye basaga nabi kubera imibereho mibi no kutagira imyenda.”

Mukandanga Epiphanie avuga ko kuba mu itsinda ry’abagore babungabunga ikiyaga cya Cyohoha byamuhinduriye ubuzima n’umuryango we

Akomeza avuga ko uretse kubona imyenda ye n’abana be, imibereho nayo yarahindutse.

Ati: “Mbere sinabashaga kwishyura ubwisungane mu kwivuza, ariko ubu nishyura ubwisungane mu kwivuza ku gihe, ndarwara nkivuza n’umwana yarwara nkamujyana kwa muganga. Ariko mbere uwarwaraga mu muryango yaremberaga mu rugo kuko ntiyari kubona uko yivuza.”

Buri mugore uri muri iri tsinda ahabwa amafaranga y’umubyizi angana n’1500Frws ku munsi, ku buryo ku kwezi bahembwa amafaranga angana n’ibihumbi 40.000Frws.

Mu kiganiro Rwandanews24 yagiranye n’Umukozi ushinzwe kurengera ibidukikije mu karere ka Bugesera Eng. Mukunzi Emile, yavuze ko uretse kubungabunga ikiyaga cya Cyohoha bakaba babona amafaranga abafasha mu buzima bwabo bwa buri munsi, bazanafashwa kubyaza umusaruro imigano iteye ku nkengero za Cyohoha.

Ati: “Imigano iteye mu gishanga cya Murago iteye ku nkengero za Cyohoha, umushinga wa Easter Africa bamboo uzabafasha kuyibyaza umusaruro kuburyo bazatera imbere kandi bagakomeza no kubungabunga iki kiyaga n’ibidukikije muri rusange badafite imbogamizi z’ubushobozi.”

Uhereye iburyo ni Eng Mukunzi Emile umukozi ushinzwe gukurikirana ibikorwa byo kubungabunga ibidukikije mu karere ka Bugesera ari kumwe n’abagore baboha ibitanda byo kwita ku ngemwe z’ibiti mu rufunzo bakura mu kiyaga cya Cyohoha (Foto: Annonciata Byukusenge)

Please Post Your Comments & Reviews

Your email address will not be published. Required fields are marked *