Rutsiro: Abafata shisha kibondo amatsinda baremye bavuga ko yabahinduriye ubuzima

Bamwe mu bagore bafatira ifu ya shisha kibondo ku kigo nderabuzima cya Kayove bavuga ko amatsinda bakanguriwe gushinga bagahuriza imbaraga hamwe yabahinduriye imibereho mu gihe kitarenze umwaka umwe n’ubwo hakiri ibyo babona nk’imbogamizi.

N’amatsinda 17 agizwe n’abanyamuryango 358 baturuka mu tugari dutandukanye tugize umurenge wa Ruhango yashinzwe biturutse ku gitekerezo cy’umuyobozi w’ikigo nderabuzima cya Kayove, Ubuyobozi bw’Akarere ka Rutsiro busanga iki gitekerezo gikwiriye gukwira mu bigo nderabuzima byose byo muri aka karere, ndetse bukanavuga ko bugiye gukora ibishoboka byose imbogamizi aba bafata shisha kibondo bagifite barabera bakabafasha zigakemuka bidatinze.

Bamwe mu bahabwa iyi fu izwi nka Shisha kibondo, isanzwe itangwa mu rwego rwo kwita ku buzima bw’umwana yaba uwo batwite cyangwa uwavutse uri munsi y’imyaka ibiri y’amavuko, bayifatira ku kigo nderabuzima cya Kayove cyo mu karere ka Rutsiro, batangarije Rwandanews24 ko amatsinda yo kwizigamira bashinze mu gihe kitarenze umwaka bamaze kubageza aheza mu kwizigamira no mu guhindura imibereho yabo mungo.

Nyiransengiyumva Pelagie wo mu mudugudu wa Kagogo, Akagari ka Nyakarera akaba n’umuyobozi w’itsinda Twiyubake agira ati “Nyuma yo guhurizwa hamwe mu matsinda, abana bose twagiraga mu mirire mibi bafite ababyeyi baba mu itsinda ryacu barazamutse bava mu igwingira, kuko turakoteza, tukaremera umuntu aho umuntu ahabwa ibihumbi 5 Frw akaguramo urukwavu, akiteza imbere akanabasha kwiyishyurira Mutuelle.”

Utaramushaka Philomene ati “Abana twaburaga icyo tubagaburira kubera ubushobozi buke, none ubu tubona ifu ya shisha kibondo harimo n’abafata amafaranga bakabasha kwikenura no kuguramo agatungo kubera ko twahurijwe mu matsinda bakatwigisha uko twatera imbere duhereye kuri duke, imyumvire y’abagabo biberaga mu kabari ntibagurire abana amagi bigatuma bagwingira kuri ubu ntibigihari.”

Utaramushaka akomeza agira ati “Nagiye mu itsinda umugabo wanjye atabyumva nyuma barandemera ngura inkwavu z’ibihumbi 5 Frw, zimaze kubyara ndazigurisha nguramo ikibwana cy’ingurube cy’amafaranga mafaranga ibihumbi 15 Frw kandi mbona ifumbire yo gushyira mu karima k’igikoni bivuze ko ntaho imirire mibi yaturuka murugo rwanjye.”

Itsinda Abanyamurava ba Kabeza nabo bavuga ko batafashe umwanzuro ngo inkunga bagenerwa yose bayishyire mu isafuriya kugira ngo nibacuka batazakomeza kubera umutwaro Leta

Muhawenimana Alphonsine wo mu itsinda Abanyamurava ba Kabeza ho mu kagari ka Nyakarera agira ati “Tutarihuriza mu matsinda twibonaga nk’abadafite ubushobozi, na shisha kibondo itaraza hari ubwo umwana yamaraga amezi abiri ataranywa igikoma bigatuma ajya mu mirire mibi, ariko kuri ubu turashimira ko iyi gahunda yaje, yatumye abana bamererwa neza kuko n’amafaranga nafashe naguzemo intama ikajya impa ifumbire.”

Niyonizeye Olive nawe wo mu itsinda Abanyamurava ba Kabeza yagize ati “Twabagaho twumva ko ntacyo twakwigezaho, none kuri ubu mu itsinda turazigama tukanagurizanya bikadufasha kwiteza imbere, twigishijwe gutegura indyo yuzuye binyuze mu bajyanama b’ubuzima kuri ubu tukaba ntawarwaza bwaki.”

Abagize aya matsinda ya shisha kibondo bishimira ko Ubuyobozi bw’ikigo nderabuzima bwabahuje bakabasha gutanga umusanzu mungo zabo, byabavanye mu bwigunge ndetse banahuza imbaraga mu gufashanya mu gihe mbere bahuriraga ku kigo nderabuzima buri wese yarafataga ifu cyangwa amafaranga agahita ataha, ariko kuri ubu bakaba babasha kuganira ku bibateza imbere. Gusa bavuga ko bagifite imbogamizi bagasaba ko bafashwa kubona imirima bagahinga, kubona inguzanyo mu buryo bworoshye, ndetse bavuga ko bakeneye amahugurwa ku mikorere y’amatsinda.

Dr. Iyakaremye Venant, Umuyobozi w’Ikigo nderabuzima cya Kayove gifite umwihariko cyonyine wo kuba cyarahuje abagifatiraho ifu ya shisha kibondo mu matsinda avuga ko gushishikariza aba bagore kwibumbira muri bene aya matsinda yo kwizigamira bigamije kubibutsa guharanira kwigira.

Ati “Twabahurije hamwe mu rwego rwo kubigisha ko buri umwe yaharanira kwigira, twarabaganirije maze nabo bifatira icyemezo cyo kujya mu matsinda yo kwizigamira bakiteza imbere none kuri ubu bamaze kugera ku rwego rwo kuba hari itsinda rigiye kubasha kwigurira ishyamba.”

Dr. Iyakaremye akomeza avuga ko aya matsinda ari urugero rw’ibishoboka ko buri munyarwanda wese mu cyiciro cy’ubudehe yaba arimo yatera imbere.

Musabyemariya Marie Chantal, Umuyobozi w’akarere ka Rutsiro wungiririje ushinzwe imibereho myiza avuga ko iki gikorwa gikwiriye mu bindi bigo nderabuzima bigafasha abagore bahabwa Shisha kibondo kwiteza imbere.

Musabyemariya ati “Ayo matsinda ari mu murenge wa Ruhango arazwi, ndetse twasabye ibindi bigo nderabuzima ko nabyo byakwigisha abafata Shisha kibondo cyangwa amafaranga bakababumbira hamwe, bakabigisha nabo bakagura inkoko bakajya babasha kubona amagi yo guha abana.”

Ku kuba bakeneye amahugurwa ku gucunga amatsinda kugira ngo bakore kandi n’ikintu natwe twumva tutasubiza inyuma, twasabye ishami rishinzwe amakoperative mu karere (BDE) kuzabasura bakabaganiriza bakamenya icyo bakeneye gufashwa, hari n’abafatanyabikorwa tuzasaba kuzajya kubigisha gucunga imishinga mito n’iciriritse, bagatinyurwa gukorana n’ibigo by’imari cyangwa bagahabwa ariya mafaranga ya VUP bakayakoresha akunguka kandi bakayishyura mu buryo butamuvunnye.

Mu karere ka Rutsiro habarurwa ababyeyi bafata shisha kibondo barenga ibihumbi8, aho abenshi biganje mu murenge wa Kivumu ufite abasaga 1,305 mu gihe umurenge ufite bake ari Boneza ufite 379.

Abanyamuryango b’itsinda Twiyubake bavuga ko amatsinda bahurijwemo yabahinduriye ubuzima

COMMENT

  • Ibi aba babyeyi bababwiye ni ukuri. Ni abagore bo mu cyiciro cya 1&2 cy’ubudehe,baboneka ku Kigo Nderabuzima buri kwezi baje gufata Shisha Kibondo n’amata bagenerwa na Leta y’Ubumwe bw’Abanyarwanda binyuze mu nkunga ya SPRP. Ku Kigo Nderabuzima bahabwa ibiganiro bijyanye n’isuku,gutegura indyo yuzuye,Gukoresha neza inyunganizi bahabwa na Leta(Amata,SHISHAKIBONDO n’amafaranga 7500 ku bari mu cyiciro cya 1 cy’Ubudehe) na Shisha kibondo n’amata gusa ku bari mu cya 1&2.

    Nyuma yo kubona ko umubyeyi atangira kwinjira muri iyi gahunda kuva agisama kurinda abyaye umwana agize amezi 24(2ans), ni ukuvuga iminsi 1000, Kandi abenshi bava muri iyi gahunda ugasanga abana babo basubira mu mirire mibi kubera ubukene,gukoresha nabi ubwunganizi bahawe muri ya munsi 1000, ni ho igitekerezo cyavuye, Ubuyobozi bw’Ikigo Nderabuzima cya Kayove,tuganira n’abakozi bashinzwe serivisi y’imirire,tubiganiraho n’Ubuyobozi bw’Umurenge wa Ruhango burabishyigikira ndetse Akarere ka Rutsiro n’Intara y’i Burengerazuba na bo babidushyigikiramo. Nyuma y’Umwaka 1 bibumbiye mu matsinda 17,rimwe rigizwe n’abantu hagati ya 25-30, Umubyeyi wese akubwira ko hari aho bimaze kumuvana n’aho bimugejeje ku buryo n’igihe yava muri iyi gahunda iminsi 1000 ishize,abana be n’umuryango we muri rusange ari nta wajya mu kibazo cy’imirire mibi. Aba babyeyi bakoteza umwe hagati y’amafaranga 500-1000 buri kwezi bahuriye mu masibo no mu Midugudu yabo. Ni amafaranga bishakira ku giti cyabo kabone n’ubwo bari mu cyiciro cya 1 &2 cy’ubudehe Aho kujya kuyanwera ikigage. Nabo ubwabo bivugira ko ari urugero rw’ibishoboka ko buri munyarwanda wese mu cyiciro cyose arimo,yakurikiza inama zo kwishyira hamwe n’abandi bagafatanya kwiteza imbere. Imbogamizi bagihura nazo ni izo kutagira ibigo by’imari bibabikira aya mafaranga ngo binajye bibashishikariza kuguza no kuyacunga, kuba harimo abashaka kwambura ayo bagurijwe na bagenzi babo, kuba batarahabwa amahugurwa yimbitse ku gucunga imishinga muto n’iciriritse, no kuba batari bajya basurwa n’abandi bantu bo ku rwego rwisumbuye ngo babakomeze muri iyi initiative bafite/Kubaha courage….

    Nk’uko babyivugira hari itsinda rigeze aho gutekereza kwigurira ishyamba riri hejuru y’amafaranga ibihumbi 500k baturutse ku guteranya amafaranga 500-1000 mu mwaka 1 gusa. Aya matsinda uko ari 17 babitse amafaranga arenga moliyoni 2,700,000 frw. Buri wese uririmo yabashije kugurizwa n’abo bari kumwe yigurira itungo rigufi(Inkoko,inkwavu,ingurube,intama n’ihene, Kandi Bose biyishyuriye Ubwisungane mu kwivuza )

    Ubuyobozi bw’Ikigo Nderabuzima cya Kayove tuzakomeza kubaba hafi no gukomeza kubakorera ubuvugizi ku rwego rw’Umurenge n’Akarere nk’uko byatangijwe.

    Harakabaho Imiyoborere Myiza ya Leta y’Ubumwe bw’Abanyarwanda iyobowe na Nyakubahwa Paul Kagame

  • Please Post Your Comments & Reviews

    Your email address will not be published. Required fields are marked *