Karongi: Avuga ko yatabaje Ubuyobozi kugeza kuri Mayor bukamwima amatwi

Utazirubanda Criaque wo mu karere ka Karongi, Umurenge wa Rubengera, Akagari ka Gisanze ho mu mudugudu wa Kabatara avuga ko yitabaje Ubuyobozi ngo bumukemurire Ikibazo afitanye na Kavamahanga Cyprien na Twagirayesu Edouard Ubuyobozi bukamwima amatwi, agakeka ko harimo ruswa.

Ubuyobozi bw’Akarere ka Karongi bwaruciye burarumira kuri iki kibazo.

Utazirubanda mu kiganiro na Rwandanews24 yadutangarije ko yaguze ikibanza kirimo inzu,imbere yayo hateretse Kontineri z’imbaho ariko Ubuyobozi bugategeka abazihafite kuzivanaho byihuse ariko bakanga kuzivanaho akaba yarabuze uko yasukura inzu ye.

Ati “Nabujijwe uburenganzira ku butaka naguze bitewe n’abantu bari baratijwe na Leta bagaterekamo Kontineri z’imbaho, maze mu minsi yashize Leta ifata gahunda yo kuzivanaho umujyi ugasukurwa maze bo banga kuzivanaho bigera n’aho Ubuyobozi buzifunga ariko kugeza n’uyu munsi bakaba barinangiye umutima nkaba narabuze uko nkora isuku ku nzu yanjye, ndetse byanteje igihombo gikabije. Nagerageje kwandikira Ubuyobozi bw’Umurenge ntibwazivanaho ndongera ndibutsa birangira nandikiye Umuyobozi w’Akarere nawe abyima amatwi.”

Utazirubanda akomeza avuga ko Kontineri zagombaga kuvanwaho mu minsi 10 uhereye umunsi Ubuyobozi bwabitangarije, ariko kuba baranze kuzivanaho bigaragaza nk’aho habayemo ruswa mu baturage kuko aba baturage batari kunanira Abayobozi, usibye njyewe ubizi neza ko Ubuyobozi bwagerageje abaturage bakabananira.

Utazirubanda arasaba Ubuyobozi kumurenganura ariko bukaba bwarabyimye amatwi

Utazirubanda akomeza asaba ko Ubuyobozi bwamufasha izi Kontineri zikavanwaho akabona uko asukura inzu ye, kuko zimuteje umwanda ikindi zikaba zubatse mu butaka yaguze bari baratijwe na Leta mu bihe byahise.

Uvuzeneza Elevanie, Umuturanyi wa Utazirubanda wanacururizaga muri izi Kontineri avuga ko ku i Santere ya Ryanyirakabano Kontineri zose zavanweho bo ababakodeshaga bakanga gusenya bakaza kuvanwamo n’Ubuyobozi bakimukira ahandi, ariko nawe akaba acyibaza impamvu izi zasigayeho kandi izindi zose zaravanweho.

Rwandanews24 twagerageje guhamaga Kavamahanga Cyprien uvugwaho kwigomeka ariko inshuro zose twamuhamagaye twasanze terefone ye idacamo.

Nk’uko bigaragara mu nyandiko Rwandanews24 ifitiye Kopi Utazirubanda yandikiye Ubuyobozi bw’Umurenge abonye ikibazo cye kidasubijwe, yarongeye arabibutsa nabwo abonye ikibazo cye kidakemuwe abona kwandikira Umuyobozi w’Akarere ka Karongi amusaba kumurenganura.

Mukarutesi Vestine, Umuyobozi w’Akarere ka Karongi yaruciye ararumira ubwo twari tumubajije kuri aka karengane Utazirubanda avuga ko yakorewe ndetse akanamwandikira ariko ntamusubize, tumubaza n’impamvu akarere karimo gusukura ibice by’Umujyi abaturage basabwa kuvugurura.

Mukarutsesi mu busanzwe udakunda kwitaba terefone kuva kuwa 18 Kamena 2022 Rwandanews24 tugerageza kumuvugisha ntiyigeze abasha gufata terefone, ndetse n’Ubutumwa twamwandikiye ku rukuta rwe rwa WhatssApp mu ijoro ryo kuri uwo munsi yarabusomye ntiyasubiza kugeza ubwo twakoraga iyi nkuru.

Inzu ya Utazirubanda yubatswe mu kibanza gikora ku muhanda wa Kaburimbo ariko Kontineri zikaba ziteretse imbere y’inzu ye (Mu ibara ritukura hasa Umukara cyane)
Igice cy’inyuma cya Kontineri ni imbaho, ndetse bakaba baranagerageje kubaka inzu y’amatafari Ubuyobozi bukabahagarika
Kontineri y’Ibara ry’icyatsi igice cyerekeye ku muhanda ni icyuma ikaba iteretse imbere y’inzu ya Utazirubanda
Ku muhanda Karongi-Rubavu mu gice cya Karongi isuku ni yose ku mazu ahubatse

Please Post Your Comments & Reviews

Your email address will not be published. Required fields are marked *