Rutsiro: Bavuga ko bubakiwe amatanura aho kubateza imbere akabatindahaza

Abaturage 90 bari bagize amatsinda atatu atandukanye bo mu karere ka Rutsiro, Umurenge wa Manihira bavuga ko muri 2009 bahawe inguzanyo inyuze muri VUP bakubakirwa amatanura atwika amatafari ahiye n’Amategura aho kubateza imbere akabatindahaza, kuko imyaka ibaye 14 barahombye Ubuyobozi bukabatera umugongo. Ni mu gihe Ubuyobozi bw’Akarere ka Rutsiro buvuga ko ikibazo cy’aba baturage bwasanze gifite ishingiro bugahitamo kubasonera kwishyura iyi nguzanyo bari barahawe.

Aba baturage bavuga ko inguzanyo bahawe ngo ibafashe kwiteza imbere yateje ubukene bukabije mu miryango yabo, kuko imibyizi batakajemo n’amafaranga bagurijwe batigeze basaruramo n’urupfumuye mubyo bashoyemo.

Biyandurijiki Stephano umwe mu bayobozi b’Itsinda Ati “Tukimara kugenerwa iyi nkunga ngo turebe ko twazamuka tukiteza imbere Ubuyobozi bw’umurenge nibwo bwatwigiye umushinga, butuzanira ba Rwiyemezamirimo baraza bubaka amatanura natwe tubumba amatafari n’Amategura dushyiramo, mugihe twiteguraga gutwika amatanura yose uko ari atatu yarahirimye n’ibyo twashyizemo byangirikiramo, twaratatse tubura uwadufasha tujya no mu burenganzira bwa Muntu. Twababajwe no kuba ba Rwiyemezamirimo bubatse aya matanura batarigeze bakurikiranwa kuko bisa nk’aho Ubuyobozi bw’Umurenge bwari bumukingiye ikibaba.”

Biyandurijiki akomeza avuga ko ibikorwa babishyizemo amaboko yabo bikabateza igihombo gikabije, no gusiragizwa mu buyobozi kubera kwirirwa biruka.

Biyandurijiki we na bagenzi be bavuga kugeza uyu munsi nta kintu cyatuma yongera kwihuza n’abandi ngo ni ukugira ngo ahabwe inguzanyo cyangwa inkunga, ahubwo agasaba ko ari ibishoboka buri muntu yajya ahabwa inguzanyo ku giti cye.

Nzamwitakuze Theophille, Umuyobozi w’iyindi Koperative yahawe inguzanyo yagize ati “Twagujije amafaranga muri VUP tugira ngo twiteze imbere badusaba kwibumbira mu matsinda turabikora, Ubuyobozi bw’Umurenge bwaragiye butuzanira ba Rwiyemezamirimo babiri, umwe yakomokaga I Musanze undi akomoka mu murenge wa Gihango, baraje barubaka birabananira bakubaka bihirima tugatabaza Ubuyobozi ntibwadutabara birangira bigeze kuri Minisitiri, Gitifu w’Umurenge amubeshya ko ari Ibiza byabayeho tukaba dusanga Umurenge waraduhombeje kuko amafaranga nta muturage wigeze ayabona mu ntoki, amafaranga yavaga kuri Konti ahita ajya kuza rwiyemezamirimo ku buryo nta muturage wigeze anayakozaho imitwe y’intoki.”

Akomeza agira ati “Ari ukwiteza imbere ntitwiteje imbere, usibye kuba inguzanyo twahawe zaradukenesheje. Turasaba ko Leta nimba ari inguzanyo itanga yajya iyiha umuntu ku giti cye aho kuyiha amatsinda.”

Mureketete Triphose, Umuyobozi w’Akarere ka Rutsiro mu kiganiro na Rwandanews24 yadutangarije ko aba baturage nyuma yo kubona ko umushinga wabo wahombye bahisemo kubasonera kuzishyura izi nguzanyo.

Ati “Abaturage twarabasoneye inguzanyo, kuko umushinga wabo wahombye.”

Izi koperative zari zigizwe n’Itsinda rya Karambo, Itsinda rya Kadehero n’itsinda rya Kabeza, aho buri tsinda ryari rigizwe n’abanyamuryango 30 rikemererwa Miliyoni 3.

Aya matanura yose yarasenyutse, ndetse n’ubutaka yubatsemo ntibubyazwa umusaruro, kandi bwari bwaraguzwe mu mafaranga y’umushinga

Inama Njyanama y’Akarere ka Rutsiro yateranye kuwa 10 Mata 2022 yemeje umwanzuro ko ikuriyeho burundu (isoneye) amafaranga Miliyoni 171,834,510FRW ku nguzanyo za VUP.

Nyirakamineza Marie Chantal, Perezidante w’Inama njyanama y’Akarere ka Rutsiro icyo gihe yatangarije Rwandanews24 ko abasonewe kwishyura inguzanyo za VUP bari mu byiciro 4 bikurikira : Abari bafite imishinga igahura n’ibiza basonewe kwishyura Miliyoni 26,093,722Frw.

Hari abahawe inguzanyo ariko bikagaragara ko bagiye mu bukene bukabije aho bagombaga kwishyura Miliyoni 143,314,788Frw bakaba barakuriweho burundu uyu mwenda.

Nyirakamineza akomeza avuga ko abandi basonewe ari Abapfuye bari barimo umwenda w’ibihumbi 298,500frw. Ndetse kandi hari abimukiye ahantu hatazwi bari barimo inguzanyo ya Miliyoni 2,127,500Frw.

Nyirakamineza avuga ko uyu mwanzuro waturutse ku mabwiriza ya LODA, ari nayo yari yaratanze izi nguzanyo ikabona ko zitakishyuwe kuko abaturage bahombye abandi bakajya mu bukene bukabije, aba bose byagaragaye ko batagifite ubushobozi bwo kwishyura hafatwa umwanzuro wo kubavana mu bitabo by’Imari ngo amafaranga atazajya akomezwa kubarwa nk’aho azishyurwa kandi byarananiranye.

Izi nguzanyo zasonewe Abaturage n’amafaranga yari yaratanzwe n’Akarere ka Rutsiro aturutse muri LODA kuva mu mwaka wa 2009 kugeza muri 2015 ngo afashe abaturage kwiteza imbere bakabura ubushobozi bwo kuyishyura.

Abaturage bo mu Midugudu ya Kadehero na Karambo bavuga bacyubakisha amatafari Rukarakara kandi iyo iyi mishinga ibasha gukora bari kuba bubakisha amatafari ahiye
Abaturage bo mu Midugudu ya Kadehero na Karambo bavuga bacyubakisha amatafari Rukarakara kandi iyo iyi mishinga ibasha gukora bari kuba bubakisha amatafari ahiye
Amatanura yubatswe muri 2009 ntiyabasha gukora

COMMENT

  • AvatarHUNGURIMANA Donatien June 9, 2022 At 8:44 pm

    Ngo ” Aho umutindi yanitse ntiriva”,ubwo mwaburiye mu migani mushakire muri zaburi

  • Please Post Your Comments & Reviews

    Your email address will not be published. Required fields are marked *