Rubavu: COOSTRAVOGI Iyobojwe inkoni y’icyuma, inteko rusange yayo yasubitswe ikitaraganya

Nyuma y’uko abanyamuryango 53 muri 70 bagize Koperative (COOSTRAVOGI) y’abatwara imodoka zizwi nka Taxi Voiture, batishimiye ubugenzuzi bwakozwe n’abagenzuzi ba Koperative, inteko rusange yasubitswe ikitaraganya, abanyamuryango bavuga ko bakeneye ubugenzuzi buvuye hanze bugakorwa na RCA.

Abanyamuryango ba Koperative bavuga ko bayobojwe inkoni y’icyuma na Perezida wabo bashinja kunyereza no gukoresha nabi umutungo wa Koperative afatanyije na komite ngenzuzi, ikaba atariyo yagakwiriye kumugenzura.

Muri iyi nteko rusange yabaye kuri uyu wa kabiri, tariki 31 Gicurasi 2022, yatangiye nyuma ho isaha yose ku gihe cyari cyateganyijwe, abanyamuryango bari banze kuyitabira kuko batari bizeye ibyavuye mu bugenzuzi.

Iyi nteko rusange yasojwe itarangiye kuko mu ngingo zagombaga kuganirwaho harimo izitakozwe, ahubwo isozwa ikitaraganya nyuma y’uko ingingo ya mbere yo kumurikira abanyamuryango uko umutungo wakoreshejwe, abanyamuryango batanyuzwe n’ibyo abagenzuzi ba Koperative babamurikiye.

Mu bibazo by’ingutu byabajijwe Perezida wa Koperative, Nkwaya Amani bakunda kwita Jado harimo ikibazo cy’akayabo ka Miliyoni ebyiri n’igice avuga ko ari isoko yatsindiye bakamwishyura amafaranga anyuze kuri Konti ya Koperative, ibyo abanyamuryango bafata nkubujura, Perezida wa Koperative yasubije abanyamuryango ko iki kibazo atifuza ku kigarukaho.

Ati “Ikibazo cy’aya mafaranga cyaganiriweho mu nteko rusange yashize kandi cyafatiwe umwanzuro sinzi impamvu mukigaruye, ndumva ntacyo narenzaho.”

Ku kibazo cyo kuba abanyamuryango batanga arenga ibihumbi 400Frw nk’umugabane shingiro, bakongera kwishyura andi mafaranga ibihumbi 400Frw ubwo abanyamuryango bakibazaga Perezida wa Koperative yariye indimi ananirwa gutanga ubusobanuro kubyo abajijwe, atangira guhamagaza abamubanjirije.

Tuyishime Jean Bosco, Umunyamabanga nshingwabikorwa w’umurenge wa Gisenyi avuga ko bagishije inama Umukozi wa RCA akababwira ko iyo nteko rusange bayihagarika, bakihutisha gusaba RCA kuba yaza gukotra ubugenzuzi bwimbitse kwinyerezwa n’ikoreshwanabi ry’umutungo rivugwa muri iyi Koperative.

Ati “Nyuma yo kugisha inama Umukozi wa RCA yadusabye guhagarika inteko rusange. Kuri ubu ikigiye gukurikira ni ugufasha abanyamuryango ba Koperative ibyo bifuza bigashyirwa mu bikorwa vuba, ubu tugiye kwandikira RCA tuyisaba ko yakwihutisha kuza gukora ubugenzuzi bwimbitse muri iyi Koperative kugira ngo ibibazo biyivugwamo bikemuke.”

Tuyishime asaba abanyamuryango ba Koperative guharanira gukora icyabateza imbere ndetse bakanoza imitangire ya serivisi kubabagana.

Prof. Harerimana Jean Bosco, Umuyobozi w’Ikigo cy’Igihugu gishinzwe guteza imbere amakoperative avuga ko iyi nteko rusange ya Koperative yabatunguye kuko bari barabagiriye inama yo gutegereza bakabanza bagakorerwa ubugenzuzi.

Ati “Iyo Koperative twari twabagiriye inama ko baba baretse gukora inteko rusange tukabanza gukora ubugenzuzi, ubu hagiye kurebwa icyakorwa kugira ngo Koperative yabo ikomeze gutera imbere.”

Prof. Harerimana avuga ko yatunguwe no kuba inteko rusange yarabaye kandi bari bohereje abakozi ba RCA bajya gukora ubugenzuzi muri iyi koperative, ndetse bagombaga kuba batangiye kuwa 31 Gicurasi 2022 ari nabwo iyi nteko rusange yabaye.

Ikindi Prof. Harerimana avuga ko iyi koperative yateguye inteko rusange itigeze yandika imenyesha RCA, bakaba bagomba kwinjira mu miyoborere yayo bakareba ko nta kibazo kirimo kuko ari bimwe mu bitiza umurindi imicungire mibi y’umutungo wa Koperative.

COOSTRAVOGI igizwe n’abanyamuryango 70, abanyamuryango bayo bakaba bavuga ko komite ngenzuzi yayo imaze imyaka irenga 10 ikigenzura, mugihe batemerewe kuba barenza imyaka 2.

Tuyishime Jean Bosco, Umunyamabanga nshingwabikorwa w’umurenge wa Gisenyi avuga ko bagishije inama Umukozi wa RCA akababwira ko iyo nteko rusange bayihagarika
Abanyamuryango ba Koperative bari bariye karungu bose bagaragaza ko bakeneye ubugenzuzi bukozwe na RCA
Perezida wa Koperative, Nkwaya Amani bakunda kwita Jado yariye indimi ubwo yabazwaga ikibazo cy’amafaranga ibihumbi 400Frw yitwa ko ari umugabane shingiro bishyura inshuro ebyiri andi ntibamenye aho ajya
Perezida wa ngenzuzi muri iyi Koperative agaragariza abanyamuryango ibyavuye mu bugenzuzi

Please Post Your Comments & Reviews

Your email address will not be published. Required fields are marked *