U Rwanda mu bihugu 44 byasinyanye amasezerano na Pfizer

Kuri uyu wa Gatatu, ubaye undi munsi wanditswemo amateka agiye guhindura icyerekezo cy’urwego rw’ubuzima mu Rwanda no mu bindi bihugu 44 birimo ibikennye n’ibikiri mu nzira y’amajyambere byasinyanye amasezerano y’imikoranire n’Uruganda Pfizer yo kujya bibona imiti yagenerwaga ibihugu byeteye imbere ku giciro kiri hasi.

Ubundi imiti yakundaga kuboneka mu buvuzi bwo mu bihugu bikennye ni izwi nka “generic drugs” ifite iyo bisa (patented drugs) ikoreshwa muri Amerika, i Burayi no mu bindi bihugu bikize yemerewe gukoreshwamo gusa, iyo miti ivura ku rwego ruhanitse indwara nyinshi usanga zinanira ya miti imenyerewe mu bihugu byiganjemo iby’Afurika.

Iyo miti iri mu bituma bamwe mu bafite ubushobozi bahitamo kwivuriza mu mahanga kuko babona ubuvuzi butandukanye n’ubwo babonaga mu bihugu byabo. Abo bidakundira usanga bivuriza mu mavuriro yigenga ashobora kubashakira iyo miti ihenze, rimwe na rimwe wasangaga idashobora kwigonderwa n’ubwishingizi bw’ubuvuzi bumwe na bumwe mu Rwanda.

Mu nama y’Ihuriro ry’Ubukungu ku Isi (WEF) iri kubera i Davos, kuri uyu wa Gatatu ni bwo Ikigo cy’Abanyamerika Pfizer  cyatangaje ko kigiye kujya gikwirakwiza iyo miti mu bihugu 45 bikennye n’ibikiri mu nzira y’amajyambere, ku giciro gihendutse muri gahunda ihabanye no gushaka inyungu y’ubucuruzi muri ibyo bihugu.

Kuri ubu Ikigo Pfizer gifite amoko 23 y’imiti n’inkingo byihariye birimo umuti witwa Comirnaty na Paxlovid, inkingo za COVID-19 ndetse n’imiti yifashishwa mu kuvura no gusukura mu kanwa.

Amasezeranoyasinywe uyu muni yiswe “An Accord for a Healthier World” yibanda ku gukemura ibibazo by’ubuzima mu nzego eshanu ari zo indwara zandura, kanseri, ibikomere, ibyorezo by’inzaduka ndetse n’imiti ivura indwara z’abagore.

Angela Hwang, Perezida w’Ikigo Pfizer, yagize ati: “Uku kwiyemeza kuzana impinduka kuzongera uburyo bwo kubona imiti ninkingo za Pfizer byageraga ku bantu bagera kur miliyari 1.2 gusa muri Leta Zunze Ubumwe z’Amerika no mu Bihugu bigize Umuryango w’Ubumwe bw’u Burayi.

Ibihugu bitanu ari byo u Rwanda, Ghana, Malawi, Senegal na Uganda ni byo byahise byiyemeza kwinjira muri icyo gikorwa nyuma bikaziyongeraho ibindi bihugu 40. Muri ibyo bihugu harimo 27 bikennye cyane n’ibindi 18 bikiri mu nzira y’amajyambere.

Perezida wa Repubulika y’u Rwanda Paul Kagame, yashimye ubu bufatanye bushya buje gutanga umusanzu ukomeye mu rwego rw’ubuzima rusange mu bihugu bikennye n’ibikiri mu nzira y’amajjyambere, bukaba bunaharurira inzira uburinganire mu kubona serivisi z’ubuvuzi ku Isi.

Yagize ati” Ubwitange bwa Pfizer muri aya mazezerano mashya bushyiraho urugero rushya, twizeye kubona n’abandi barwigana. Ibi nibihuzwa no kongera ishoramari mu rwego rw’ubuzima rusange muri Afurika ndetse no mu bugenzuzi, ni intambwe y’ingenzi cyane mu kugera ku mutekano urambye w’ubuzima mu bihugu bigifite ubukungu buri hasi.”

Yakomeje agira ati: “U Rwanda rwishimiye cyane kuba mu bihugu byemeje ayo masezerano, hamwe n’ibihugu by’abafatanyabikorwa, kandi twiteguye kongera iyi miti itabara ubuzima bw’abantu ku ruhurirane rw’imiti itangwa mu buzima rusange.

Ubushakashatsi bugaragaza ko hejuru ya 70% y’ibihugu bikiri mu nzira y’amajyambere ari ho hagaragara umutwaro uremereye cyane w’indwara n’ibyorezo, ariko ugasanga ni byo bihugu bitakazwaho nibura 15% by’ingengo y’imari ikoreshwa mu rwego rw’ubuzima ku Isi, bigatanga umusaruro uteye inkeke.

Ubushakashatsi bwagaragaje ko mu bihugu byo munsi yo munsi y’Ubutayu bwa Sahara, nibura umwana umwe muri 13 apfa atarageza ku myaka itanu y’amavuko, ugereranyije n’umwe ku 199 mu bihugu byateye imbere.

Imfu ziterwa na Kanseri nanone na zo ziri hejuru cyane mu bihugu bikennye kurusha ibikize ku Isi, aho usanga abapfa bazize kanseri muri Afurika baba baruta abicwa na Malaria buri mwaka.

Subiza ku gitekerezo

Your email address will not be published. Required fields are marked *

Translate »