Imbarutso ya Jenoside yakorewe Abatutsi si indege “Umuhanzi Justin Nsengimana”

Ubwo yifatanyaga n’Abanyeshuri bo muri GASS kwibuka Jenoside yakorewe Abatutsi ku nshuro ya 28 yongeye kwibutsa Abanyeshuri biganjemo Urubyiruko abinyujije mu buhanzi bwo kuririmba insanganyamatsiko ivuga ko imbarutso ya Jenoside yakorewe Abatutsi muri Mata 1994 atari indege.

Abanyeshuri bo muri GASS bavuga ko ibiganiro by’amateka bahawe bikeneye guhoraho bikagurwa bikagezwa no mu giturage mu rubyiruko rutabashije kubona amahirwe yo kwiga.

Mbabazi Eliane wiga mu mwaka wa gatandatu muri Gass mu ishami rya MCE ati “Urubyiruko dukeneye kumenya amateka y’Igihugu cyacu, tukamenya ko aritwe mbaraga z’Igihugu ari natwe tuzacyubaka, tugatandukana n’abari Urubyiruko nkatwe bijanditse bagakora Jenoside.”

Mbabazi avuga ko nk’Urubyiruko bakwiriye kwigisha abagifite ingengabitekerezo bagahinduka kuko amacakubiri yaganishije u Rwanda ari habi.

Mbabazi yaboneyeho gusaba Umuhanzi Justin Nsengimana kwagura gahunda yatangije yo kwigisha urubyiruko ntigarukire mu bigo by’amashuri ahubwo ikabasha kugezwa no mu giturage.

Nziza Arsene ati “Nyuma yo gusobanukirwa amateka twabashije kumva ko Jenoside yakozwe n’Urubyiruko ndetse ihagarikwa n’Urubyiruko tukaba tugomba kubakira ku byiza igihugu cyacu gishaka, duhanagana n’abahakana bakanapfobya Jenoside yakorewe Abatutsi.”

Nsengimana Justin ati “Nk’Umuhanzi nahisemo gutanga umusanzu mu rubyiruko bagenzi banjye nkazamura impano z’abana binyuze mu marushanwa yo kuririmba no kwandika imivugo ku nsanganyamatsiko igira iti Imbarutso s’Indege mu rwego rwo kugaragaza ko Jenoside itatewe n’ihanurwa ry’Indege ya Habyarimana Juvenal wari Perezida w’u Rwanda.”

Akomeza agira ati “Rubyiruko nimwe Rwanda rw’ejo kandi nimwe muzasigasira ayamateka, abavuga ko intandaro ari indege, ko 1990 bishe Abatutsi ba Kibirira abandi bakameshwa, 1992 Abagogwe bakicwa ese nabwo hari haguye indege? Mukeneye kumenya amateka atagoretse kuko arimwe Rwanda rw’ejo.”

Nsengimana avuga ko muri uru rubyiruko abazatsinda bazajyanwa muri studio bagakorerwa indirimbo, n’imivugo kugira ngo ubutumwa burimo buzabashe kugera kuri benshi, ndetse yizeza abanyarwanda ko tuzasoza iminsi ijana yo kwibuka yaramaze guhemba.

Nsengimana Justin asaba abahanzi bagenzi be gutanga ubutumwa bwigisha Urubyiruko kuko ari rwo Rwanda rw’ejo.

Mugisha Francois, Umukozi w’Akarere ka Rubavu ushinzwe guhuza ibikorwa by’Itorero avuga ko ibiganiro by’amateka bisanzwe bitangwa mu midugudu bakaba barasanze ko ari ngombwa kwegera n’abari mu mashuri ngo basobanurirwe amateka.

Ati “Muri iki gihe twibuka haba hateganyijwe ibiganiro bitandukanye harimo n’Ibigo by’Amashuri, kubera ko ibiganiro biba bisanzwe bitangwa mu midugudu tukaba twarasanze urubyiruko tugomba kubasanga ku bigo by’amashuri kugira ngo bamenye amateka y’igihugu kandi bafite inyota yo kuyamenya, tukaba tubizeza kubaba hafi tukabegera tukabaganiriza.”

Mu muhango wo kwibuka ku nshuro ya 28, urubyiruko rwazize Jenoside yakorewe Abatutsi mu 1994, Minisiteri w’Urubyiruko n’Umuco, Mbabazi Rosemary, yibukukije abawitabiriye ko bafite inshingano zo kubaka igihugu bafatiye urugero ku Nkotanyi zakiyobohoye.

Minisitiri w’Urubyiruko n’Umuco, Rosemary Mbabazi yasabye urubyiruko kudafata kwibuka nk’umuhango ahubwo ko ari igihango bafitanye n’igihugu bakaba bagomba kucyubaka kugira ngo ahazaza hacyo hazabe ari heza.

Abanyeshuri bo muri GASS banyuzwe n’ibiganiro by’Amateka bagejejweho, ubwo bibukaga Jenoside yakorewe Abatutsi ku nshuro ya 28

Please Post Your Comments & Reviews

Your email address will not be published. Required fields are marked *