Gasabo: Inyubako z’abaturage zibasiwe n’inkongi y’umuriro hakomereka abantu 3

Mugitondo cyo kuri uyu wa mbere taliki ya 16 Gicurasi 2022, inzu z’abaturage mu Mudugudu wa Kibiraro1, Akagali ka Nyarutarama mu Murenge wa Remera, bagiye kubona babona inzu zirimo kugurumana batazi impamvu hakomereka abantu 3 nk’uko babibwiye Rwandanews24.

Bamwe mu baturage baganiriye na Rwandanews24 bavuga ko uretse kuba babonye umuriro ugurumana batamenye aho waturutse.

Ati: “Njyewe nari nagiye mu kazi numva barampamagaye ngo iwacu harimo gushya, ubwo nahise ngaruka mu rugo kureba uko bimeze nsanga harimo gushya tugerageza gutabaza.”

Akomeza avuga ko mu nyubako zibasiwe n’inkongi y’umuriro hario n’inzu zo guturamo. Ati: “Inzu zahiye harimo izari zituwemo, Restaurant, Agakiriro ka Nyarutarama ari nako kibasiwe cyane kurusha izindi nyubako.”

Umugabo uzwi ku izina rya Kazungu niwe wakomeretse ku itama ubwo yari arimo gutabara agasohokana imisego mu nzu, ihema ryari ku muryango ryamutwitse ubwo yari arinyuzeho akaba yahise ajyanwa kwa muganga. Umugore utahise umenyekana imyirondoroye we yahise agira ihungabana nyuma yo kubona inzu ye yibasiwe n’inkongi y’umuriro, nawe akaba yahise ajyanwa kwa muganga. undi muntu wagizweho ingaruka n’iyi nkongi ni umwana wahiye ku kuguru ubwo bazimyaga iyi nkongi y’umuriro, nawe akaba yajyanywe kwa muganga ngo yitabweho n’abaganga.

Amakuru y’ibanze Rwandanews24 yamenye ni uko inzego za Polisi ishami rishinzwe gukumira inkongi y’umuriro yahise itabara izana kizimyamwoto 3 zigerageza kuzimya, ariko amazi yaje kuzishirana hacamo umwanya muto bajya kuzana andi kubera ko inkongi yari yamaze gukwira ahantu hanini.

Ikigo cy’Igihugu gishinzwe gukwirakwiza ingufu z’amashanyarazi REG gifatanyije na Polisi batangaje ko iyi nkongi itatewe n’amashanyarazi, ahubwo ko yaturutse ku mirimo yari irimo gukorerwa mu Gakiriro ka Nyarutarama.

Please Post Your Comments & Reviews

Your email address will not be published. Required fields are marked *