Muri dosiye ya Ishimwe RIB yashyikirije Ubushinjacyaha harimo ibyaha 3 akurikiranyweho

Urwego rw’Igihugu rw’Ubugenzacyaha rwashyikirije Ubushinjacyaha dosiye ya Ishimwe Dieudonne uzwi nka ‘Prince Kid’, uherutse gutabwa muri yombi akekwaho ibyaha bifitanye isano n’ihohoterwa rishingiye ku gitsina yakoreye abakobwa bitabiriye irushanwa rya Miss Rwanda mu bihe bitandukanye.

Prince Kid wari Umuyobozi wa Rwanda Inspiration BackUp itegura Miss Rwanda yatawe muri yombi kuwa 26 Mata 2022.

RIB yatangaje ko yashyikirije Ubushinjacyaha Dosiye ikubiyemo ibyaha uyu mugabo akurikiranyweho kuri uyu wa 4 Gicurasi 2022.

Iperereza ry’ibanze ryagaragaje ko Prince Kid akekwaho ibyaha bitatu aribyo: gukoresha undi imibonano mpuzabitsina ku gahato, gusaba cyangwa gukora ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.

Icyaha cyo gukoresha umuntu imibonano ku gahato gihanishwa imyaka iri hagati ya 10 na 15 y’igifungo n’ihazabu iri hagati ya miliyoni 1Frw na miliyoni 2Frw.

Icyo gusaba cyangwa gukora ishimishamubiri rishingiye ku gitsina, gihanishwa igihano cy’igifungo Kiri hagati y’imyaka 5-7, n’ihazabu iri hagati ya miliyoni 1Frw na miliyoni 2Frw.

Icyaha cya gatatu cyo guhoza undi ku nkeke bifitanye isano n’imibonano mpuzabitsina, gihanishwa igifungo kiri hagati y’umwaka umwe n’imyaka ibiri hakiyongeraho n’ihazabu iri hagati y’ibihumbi 100 Frw n’ibihumbi 200Frw.

Umuvugizi wa RIB, Murangira B Thierry atanga ubutumwa,yasabye buri wese uziko yakorewe ihohoterwa rishingiye ku gitsina gutinyuka agatanga amakuru yaba kuri RIB cyangwa icyicaro cya “Isange one stop center” kimwegereye.

Yasabye abitinye bose gushyiramo imbaraga bagatinyuka kuvuga kuko aribwo buryo bwonyine bwatuma ibi byaha bicika burundu.

Umuvugizi wa RIB yaboneyeho kandi umwanya wo kwihanangiriza abakoresha imbuga nkoranyambaga baha inkwenene uba yagerageje gutanga ikirego, abibutsa ko ari ibintu bishobora kwica iperereza bikaba kandi byakurikiranwa mu buryo bw’amategeko.

Please Post Your Comments & Reviews

Your email address will not be published. Required fields are marked *