Rutsiro: Icyateraga Impfu z’Abana kwa Muganga cyakojejweho umwotso

Ubuyobozi bw’Ibitaro by’Akarere bya Murunda buvuga ko ibibazo byugarije abana n’ababyeyi byateraga n’impfu ku bana bakivuka bigenda bigabanuka bitewe n’impamvu nyinshi zirimo kongera umubare w’ababavura, bongererwa ubushobozi , bahabwa amahugurwa atandukanye n’ubumenyi mu ku bitaho burazamurwa, hanongerwa ibikoresho n’imiti, gusa umubare w’Ababyaza uracyari muto ugereranyije n’abakenewe.

Ishami ry’Umuryango w’Abibumbye ryita ku Buzima OMS rigaragaza ko ubuzima bw’umwana n’umubyeyi muri Afurika buri mu kaga kuko bibasirwa n’indwara zikarinda zibahitana.

Mu Rwanda hagaragazwa ko ipfu zibasira ibi byiciro byombi zigenda zigabanuka n’ubwo hakiri ibikwiye kunozwa.

Muri gahunda z’Icyerekezo 2050 u Rwanda ntirwibagiwe serivisi y’Ubuzima

U Rwanda ruzashimangira ibyo rwagezeho mu rwego rw’ubuzima birimo kuba rwarabashije kugera ku ntego z’Iterambere ry’Ikinyagihumbi (MDGs) zari zigamije guteza imbere serivisi z’Ubuzima zihabwa ababyeyi n’abana. Hakurikijwe ibiteganyijwe kugerwaho mu rwego rw’Intego z’Iterambere Rirambye (SDGs), umubare w’ababyeyi bapfa babyara, uw’abana bapfa bavuka, uw’abana bari munsi y’umwaka umwe n’abana bari munsi y’imyaka itanu bapfa uzagabanuka cyane ugere ku bipimo biboneka mu bihugu byateye imbere (uzagabanukaho hagati ya 70% na 90%).

Dr. Niringiyimana Eugene, Umuyobozi w’Ibitaro bya Murunda avuga ko kugira ubufatanye bw’abajyanama b’Ubuzima, abaforomo n’Ababyaza n’abandi bakozi b’Ibitaro ariwo musemburo wo kugabanyuka kw’impfu z’abana n’ababyeyi mu Bitaro bya Murunda, ku buryo mu myaka ibiri ishize nta mwana urapfa mu bitaro arimo avuka.

Ati “Mu isuzuma twari twakoze muri uyu mwaka twasanze mu myaka irenga ibiri nta mwana urapfira mu bitaro avuka, kuko ibikoresho birahari, imiti yo kubitaho irahari bikagendana na serivisi nziza zitangwa n’ababyaza n’Abaforomo mu kwita no gukurikirana ababyeyi baje kubyarira mu bitaro bya Murunda nibyo byatumye impfu z’abana bavuka zigabanuka zikagera kuri zeru mu myaka ibiri ishize. Gusa hari ubwo umwana ashobora gupfa nyuma yo kuvuka kubera ko hari impamvu nyinshi zibitera nko kuba yavuka ananiwe cyangwa avuka atujuje ibiro byagenwe.”

Dr. Niringiyimana avuga kandi ko uruhare rw’Abajyanama b’Ubuzima mu kwigisha ababyeyi byatumye basobanukirwa impamvu yo gukurikirana umwana kuva agisamwa kugeza ku minsi 1000, nabyo byatumye bumva ibintu kimwe n’ababyeyi bigatuma iyi mibare iganuka.

Ikindi yongereyeho n’uko mu bitaro bya Murunda bafite Abaforomo 58 buzuye abasabwa naho ababyaza baracyari bake kuko muri 26 bakenewe hari 10 ariko bijyana no kuba umubare wabo ukiri muke ku isoko ry’Umurimo kuko utapfa kubona udafite akazi, ari nayo mpamvu Leta yatangije amashuri yigisha ababyaza n’abaforomo mu kugira ngo bazazibe icyuho.

Ndayambaje Jean d’Amour, Umubyaza mu bitaro bya Gakoma biherereye mu karere ka Gisagara asanga impamvu myaka yashize imibare y’impfu z’abana bapfiraga kwa muganga ari uko umubare w’ababyaza wari muke.

Ati “Mbere hari ikibazo cy’Ababyaza bake, ibyo bigatuma abafasha ababyeyi baje kwibaruka baba bakeya, ndetse n’abafite ubumenyi mu gufasha umwana guhumeka nabo bari bakeya, ibyo byose rero byatumaga izo mpfu ziyongera, ariko ubu hashyizweho Ibigo byigisha abo bantu, imibare yabo iba myinshi bityo izo pfu ziragabanuka.”

Ndayambaje avuga ko Ababyeyi uruhare rwabo ari ugukurikiza Inama bagirwa n’abaganga, harimo gusobanukirwa neza ibimenetso mpuruza ndetse no kugera kwa muganga ku gihe batarindiriye kubanza gufatwa n’ibise.

Bamwe mu babyeyi bagana Ibitaro bya Murunda bashimira serivisi nziza basigaye bahabwa zinabafasha kurokora ubuzima bwabi nubw’abo bibarutse.

Niyonsaba Safi, atuye mu murenge wa Boneza, ku kirwa cya Bugarura mu kiganiro yahaye Rwandanews24 ubwo twamusangaga yaraye abyariye muri ibi bitaro yavuze ko yahawe serivisi nziza ariko asaba ko umubare w’ababyaza wakongerwa.

Ati “Naturutse Boneza merewe nabi, nageze ku Bitaro bambyaza mbazwe kandi nabyaye neza, nkaba nishimiye serivisi nahawe kuko abaganga bo mu bitaro bagukurikirana kuva uhageze kugeza utashye. Gusa mubyo dusaba nuko umubare w’ababyaza nawo wakongerwa kuko iyo haje ababyeyi benshi baravunika natwe tukabibona.”

Tuyisenge Berancille wo mu murenge wa Musasa ati “Mu  bitaro iyo wahageze bakwitaho, kuko nkanjye nabyariye muri Ambulance banzanye ku bitaro. Ikimenyi menyi naraye mbyaye ariko banyitayeho ku buryo ndimo gusaba ngo bansezerere.”

Mu karere ka Rutsiro habarurwa abajyanama b’Ubuzima 1,932.

Ibitaro bya Murunda nta muganga w’inzobere n’umwe bifite, ariko mukwishakamo ibisubizo inzobere ziturutse mu bitaro bya Gisenyi n’ibya Kibuye ziza kwita ku barwayi bo muri ibi bitaro inshuro 2 mu kwezi, binafite kandi Aba Dogiteri 11.

Ndayambaje Jean d’Amour, Umuforomo mu bitaro bya Gakoma, mu karere ka Gisagara asanga ababyeyi batwite bakwiriye gukurikiza inama bahabwa na Muganga, bakanarushaho gusobanukirwa ibimenyetso mpuruza bakanagera kwa muganga ku gihe

Please Post Your Comments & Reviews

Your email address will not be published. Required fields are marked *