Rutsiro: Ubujurire bw’Akarere bwateshejwe agaciro, Akarere kongera kwigaranzurwa n’Abakozi

Kuri uyu wa gatanu, tariki 22 Mata 2022 urubanza rw’Akarere ka Rutsiro n’abakozi mu rukiko rwisumbuye rwa rusizi rwapfundikiwe, maze Ubujurire bw’Ubushinjacyaha buteshwa agaciro kuko umwanzuro wagaragaje ko nta shingiro bufite, rutegeka ko umwanzuro w’Urukiko rwisumbuye rwa Karongi, Akarere kari katsinzwemo ukomeza kubahirizwa.

N’Urubanza Akarere karegagamo abakozi bako, kavuga ko bakoresheje umutungo wa Leta nabi, akarere kaza gutsindwa mu Rukiko rwisumbuye rwa Karongi, ubushinjacyaha buhita bujurira uyu mwanzuro w’uru Rukiko rwasomwe muruhame kuwa 09 Ukuboza 2020.

Umwanzuro w’Urukiko rwisumbuye rwa Rusizi wasomye kuri uyu wa 22 Mata 2022, RWANDANEWS24 ifiteye kopi ugira uti “Ikirego cy’Ubushinjacyaha nta shingiro gifite.”

Uru rubanza rwari rufite numero RPA/ECON 00004/2021/HC/RSZ NPA HC-RUSIZI yaburanagamo na Basabose Alex, Bisangabagabo Slyvestre, Icyizihiza Alda, Kagaba Jean Baptiste, Kamana Jean Marie, Mpirwa Migabo, Munyamahoro Cyato Justin, Murari Richard, Ndagijimana Aloys, Ngabo Fadhili Emmanuel, Nshizirungu Emmanuel, Ntihinyuka Janvier, Rutayisire Munyambaraga Deogratias, Sekamana Theophile na Uwumukiza David.

Rwandanews24 yagerageje kuvugisha bamwe murebwaga n’iki kibazo, batifuje ko imyirondoro yabo ijya mu Itangazamkuru bayitangariza ko bishimiye imikirize y’Urubanza, kuko Ukuri iteka guhora kuganza ikinyoma.

Umwe ati “Twishimiye imikirize y’urubanza, kuko twari twasizwe urubwa n’Ubuyobozi, bamwe muri twe bakoraga akazi badatekanye, ariko kuva uyu munsi tugiye kujya mu ngamba mugufasha Akarere kwesa imihigo.”

Undi yagize ati “Ibyo twakorewe n’akarengane, tukaba dusaba ko twakwishyurwa imishahara yacu mu minsi ya vuba nk’uko itegeko ribiteganya kuko ubwo twari dufunzwe byadusabye kujya mu madeni ngo tubashe kwishyurira abana amashuri, no gutunga ingo zacu. Imana ishimwe kuko ariyo itajya ituma abarengana barenganywa..”

Icyo Ubuyobozi bw’Akarere buvuga ku mikirize y’urubanza

Havugimana Etienne ati “Urubanza rwatangiye mu mpera za 2020, aho hakurikiranwaga abakozi b’Akarere 14 na Rwiyemezamirimo 1, bakekwaho kuba barishyurije Rwiyemezamirimo amafaranga kandi yaratanze ibikoresho bituzuye Urukiko rwa Karongi rubagira abere, Ubushinjacyaha burajurira none Urukiko rwisumbuye rwa Rusizi narwo rwanzuye ko umwanzuro w’urukiko rwisumbuye rwa Karongi ugumaho.”

Havugimana Etienne avuga ko urubanza ruba itegeko mu gihe cy’Iminsi 30 ku buryo niba irangiye ibiteganywa n’amategeko bizubahirizwa.

Ati “Urubanza ruba itegeko mu minsi 30, niba irangiye itegeko rizubahirizwa abakozi bahabwe imishahara yabo y’amezi atandatu bafunzwe badakora, kuko bayibikiwe nk’uko itegeko ribiteganya ko iyo umukozi wa Leta hari amakosa akurikiranweho imishahara ayibikirwa.”

Kuri Rwiyemezamirimo Havugimana avuga ko ibitegenywa n’amategeko bizubahirizwa kuko Ubutabera bw’u Rwanda bukora imirimo yabwo neza, nabo nk’abayobozi bakubahiriza ibyo amategeko ateganya.

Kuwa 09 Ukuboza 2020, Urukiko Rwisumbuye rwa Karongi nibwo rwasomye muruhame, maze rugira abere abakozi 14 b’Akarere ka Rutsiro na rwiyemezamirimo nyuma y’amezi atandatu bamwe muribo bafunzwe bakurikiranyweho kunyereza umutungo wa Leta.

Umucamanza Riziki Isabelle nyuma yo kugaragaza ko abaregwa n’Ubushinyacyaha nta bimenyetso bibahamya icyaha, yatangaje ko urukiko rubagize abere, ategeka ko bahita banarekurwa.

Ibiro by’Akarere ka Rutsiro

Please Post Your Comments & Reviews

Your email address will not be published. Required fields are marked *