Karongi: Umwarimu yaguwe gitumo arimo kugurisha Ibitabo by’Ishuri

Umwarimu bahimbye izina rya Papa Cyangwe mu tubari asanzwe anyweramo Urwagwa, yaguwe gitumu arimo kugurisha ibitabo by’Ishuri yigishaho. Ubuyobozi bw’Akagari iri shuri riherereyemo yahamije aya makuru.

Kanani Vincent, usanzwe akora akazi ko kwigisha mu Rwunge rw’Amashuli  rwitiriwe Mutagatifu Dominiko Ruragwe ruherereye mu karere ka Karongi, Umurenge wa Bwishyura ho mu kagari ka Kayenzi akurikiranwe kwiba ibitabo by’Ishuri yigishaho akajya kubigurisha, amafaranga akuyemo akayanywera Urwagwa.

Mukurarinda Elias, Umuyobozi wa G.S Ruragwe avuga ko imyitwarire ya Kanani Vincent igayitse idakwiye Umwarimu kandi ko yamukoreye  raporo kenshi zimwe zigashyikirizwa  Akarere, ahamya  ko ejo yatawe muri yombi nyuma yo gufatirwa mu cyuho arimo kugurisha ibitabo by’Ishuli.

Ati “Ejo bamufatanye ibitabo 4 amaze kugurishamo icy’Imibare cyo mu mashuri abanza.”

Mukurarinda akomeza avuga ko uyu mwarimu kuwa 14 Werurwe 2020 uyu mwarimu yatawe muri yombi ashaka kugurisha Mudasobwa y’Ikigo, akanashyikirizwa RIB kandi akaba yarokamwe n’ubusinzi bukabije yaba ku manywa no mu ijoro. Ndetse kanama k’imyitwarire ku kigo  twari kamwizeho  kamusabira  guhagarikwa  amezi  atatu mu minsi yashize.

Mukurarinda yaboneyeho gusaba Abarimu bagenzi kurangwa n’ingeso nziza nk’uko babitozwa kurangwa n’ingangagaciro na kirazira bakazirikana ko barimo kurerera u Rwanda.

Niyomwungeri Daniel, umunyamabanga nshingwabikorwa w’Akagari ka Kayenzi yahamije aya makuru.

Ati “Ni byo koko ejo twumvise  amakuru ko uyu mwalimu ukunda kuba muri ako kabari k’urwagwa hari Ibitabo ari kugurisha, aho kimwe yagishakagamo  amafaranga 500 y’u Rwanda  ariko bo bakamuha amafaranga 250Frw ahwanye  n’ icupa ry’urwagwa rimwe, twahise  tujyayo dufata  uwari umaze ku  kigura maze  atubwira ko  impamvu  yakiguze yagiraga ngo abana  be bage  bacyigiramo  kuko we rwose  atazi gusoma.”

Uyu mwarimu twamusanganye kandi n’ibindi bitabo mu mufuka  atubwira  ko yari agiye  kwigisha abana ariko  abaturage bamushinja  ko amaze iminsi abigurisha.

Uyu mwarimu usanzwe yigisha isomo ry’Ubukungu (Economy) mu mashuri yisumbuye kuri ubu afungiye kuri RIB Sitasiyo ya Bwishyura.