Karongi: Abaturage ntibavuga rumwe n’Ubuyobozi ku isoko nyambukiranyamipaka

Abaturage bavuga ko amafaranga Igihugu cyashoye mu mirimo yo kubaka isoko nyambukiranyamipaka (Cross Boarder Market) ryubatswe mu Murenge wa Bwishyura, akarere ka Karongi yapfuye ubusa kuko barifata nk’aho ridakorerwamo bijyanye n’agaciro karyo kuko rirema inshuro imwe mu cyumweru.

Abaturage baganiriye na rwandanews24, bavuga ko umushinga wo kubaka iri soko wizwe nabi kuko barijyanye ahitaruye abaturage kandi aribo bagombaga kwegerezwa iterambere.

Habimana Jean, ati “Ese ni gute isoko rishorwamo amafaranga aho kuryegereza abaturage bakaribahungisha, mu myaka yashize bajyanyeyo abacuruzi ngo bajye gushyirayo Ububiko bwabo, ariko ntibamazeyo kabiri kuko basanze nta muturage watega moto agiye kugurayo agati k’isabune ku kiranguzo. Ubuyobozi bw’Akarere bujye bubanza bwige imishinga neza bunabanza burebe aho bugiye kuyishyira naho ubundi bisa nko kujugunya amafaranga.”

Umuturage wahawe izina rya Uwera muri iyi nkuru, yagize ati “Kugera aho isoko ryubatse bisaba gutega moto y’ibihumbi bibiri kugenda no kugaruka, ese ubwo urumva wajya kurihahamo iki? Njyewe mbona abaturage bagakwiriye kujya bagira ijambo mu bikorwa bakorerwa mbere yo guhabwa ibyo batazakoresha.”

Uwera akomeza avuga ko bigoye kuzabona iri soko rikora nk’uko babyizezwaga ubwo ryari ritangiye kubakwa, kuko ntiwaba ugiye guhaha ibintu bifite agaciro k’amafaranga 1000frws, ngo utegeshe ibihumbi 2000frws ugiye kubizana. Icyo gihe uhahira ahakwegereye.

Iri soko nyambukiranyamipaka ricururizwamo amatungo yiganjemo amagufi n’amaremare, rikaremwa n’abaturutse impande zose

Iri soko nyambukiranyamipaka ricururizwamo amatungo magufi n’amaremare, rikaremwa n’abaturutse impande zitandukanye.

Mu kiganiro kihariye Rwandanews24 yagiranye n’Umuyobozi w’Akarere ka Karongi wungirije Ushinzwe Iterambere ry’Ubukungu Bwana Niragire Théophile, avuga ko iri soko atari iry’akarere ka Karongi gusa kandi ko ryagenewe kurema ku munsi wa gatanu w’icyumweru wonyine n’ubwo hari zimwe mu nyubako zaryo zidakorerwamo.

Ati “Isoko nyambukiranyamipaka rya Karongi rirakora buri wa gatanu w’Icyumweru hambuka ibicuruzwa bitandukanye byiganjemo amatungo byose bigurwa n’abaturanyi bo mu gihugu cya Congo. Ntabwo ari isoko ry’Akarere ngo rikore buri munsi. Zimwe mu nyubako zaryo ntizikoreshwa kubera ko mu gihe cya Covid-19 nta bacuruzi bari kuza gushyiramo ibicuruzwa byabo.”

Bwana Niragire akomeza avuga ko barimo gushishikariza abashoramari kuzana ibicuruzwa byabo kugira ngo inyubako zose zibashe gukoreshwa.

Niragire ahumuriza abaturage bifuza kuba bagira ibicuruzwa bahaha cyangwa bohereza mu gihugu cy’abaturanyi cya Congo ko bajya babanza kubaza urutonde rw’ibyemewe muri ubu buhahirane.

Isoko nyambukiranya mipaka rya Karongi ryubatse mu Murenge wa Bwishyura, akagari ka Gasura, Umudugudu wa Ruganda, ryatwaye akayabo ka Miliyari n’igice by’amafaranga y’u Rwanda, akaba yarakomotse ku nkunga ya Banki y’Isi.

Byari biteganyijwe ko iri siko ryuzura mu mwaka wa 2016, ariko siko byagenze dore ko ryanateje igihombo Akarere bitewe n’uko hari ibikubiye mu masezerano bitararishyirwaho birimo umuhanda utunganyije uriganaho, aho imodoka ziparika,… ibi byose byagiye bikunda kunengwa na raporo y’Umugenzuzi Mukuru w’Imari ya Leta ndetse na Komisiyo ishinzwe gukurikirana imikoreshereze y’Imari n’Umutungo by’Igihugu (PAC).

Imirimo yo kubaka iri soko yagombaga kurangizwa mu mezi 12
Imwe mu nyubako zidakorerwamo mu Isoko nyambukiranyamipaka rya Karongi
Inyubako z’Isoko ziracyashakirwa abacuruzi baza kuzikoreramo

Please Post Your Comments & Reviews

Your email address will not be published. Required fields are marked *