Rutsiro: #Kwibuka28: Abarokotse jenoside yakorewe Abatutsi basabye ko imanza gacaca zakwihutishwa

Kuri uyu wa kane, ubwo mu Rwanda hatangizwaga Icyunamo cy’iminsi 100 hibukwa inzirakarengane zazize uko zaremwe zitabihisemo, bamwe mu barokotse Jenoside yakorewe Abatutsi basabye Ubuyobozi bw’Akarere gusigasira no ku bungabunga ibimenyetso by’amateka ya Jenoside, banasaba ko Imanza z’Inkiko gacaca zakwihutishwa.

Ni mugihe Ubuyobozi bw’Akarere ka Rutsiro buvuga ko buzagerageza gushyira mu ngiro ibishoboka byose, birimo no kwihutisha imanza gacaca zitararangizwa.

Abarokokeye mu karere ka Rutsiro bafite ubuhamya buteye intimba

Setako Jean Pierre warokokeye mu murenge wa Gihango, Akarere ka Rutsiro ashimira Inkotanyi zamuhaye ubuzima agaterwa intimba n’uko abe bashize ariko asaba abanyarwanda muri ibi bihe kwirinda gusinda Umutekano n’amahoro bahawe n’Inkotanyi bakarushaho kwibuka biyubaka.

Ati “Nahuye n’akaga gakomeye ubwo twasozaga umwaka wa 8 ntararenza umwanya wa kabiri mu Ishuri, ariko sinemererwa kujya kwiga mu mashuri abanza kubwa politiki yariho mu burezi aho higaga uwatoranyijwe mu gihe hagakwiriye kwiga uwabitsindiye.”

Mu mwaka w’ 1989 nashatse kujya mu Gisirikare cyo kwa Habyarimana njyewe na bagenzi banjye, nkora ibizamini bisabwa byose, ngaragara no ku rutonde rw’abatsinze ariko twaracaguwe bamwe baragenda abandi barasigara, igihe cyaje kugera ngo natwe tugende muganga ansuzumye abura icyo andega ariko avuga ko Ntabasha kurya inyama z’imbogo, ndataha.

Nyuma nafashijwe kujya mu Gisirikare cy’Inkotanyi, aho naje kujyamo mbasha no kurokoka kandi uyu munsi ndacyariho, twese muri ibi bihe turimo twirinde gusinda umutekano no gusinda Amahoro.

Niyonsenga Phillipe, Uhagarariye IBUKA mu karere ka Rutsiro yasabye Ubuyobozi bw’Akarere gukurikirana neza ko bataha hakiri uwarokotse Jenoside yakorewe Abatutsi udafite aho akinga umusaya.

Ati “Muri iki gihe twibuka ku nshuro ya 28 ntibikwiriye ko haba hakiri uwarokotse Jenoside yakorewe Abatutsi utagira aho akinga umusaya, mu kwibuka twiyubaka tunazirikane kubungabunga amateka ya Jenoside yakorewe Abatutsi kuko bigisa nk’aho bigenda biguru ntege muri aka karere.”

Niyonsenga mu gusoza ijambo rye yashimiye Inkotanyi zamurokoye anaboneraho gusaba ko imanza za Gacaca zitararangizwa Ubuyobozi bw’akarere bwashyiramo imbaraga zikihutishwa.

Murekatete Triphose, Umuyobozi w’Akarere ka Rutsiro avuga ko Abanyarwanda dukwiriye kubakira k’Urukundo, tukubakira kuri Ndi Umunyarwanda, abana bakigishwa indangagaciro na kirazira.

Ati “Abantu bakwiriye kugira Ubutwari bakavugisha ukuri bakagaragaza aho imibiri y’abishweitarashyingurwa yajugunywe igashyingurwa mu cyubahiro. Twubakire k’Ukuri no kuri Ndi Umunyarwanda, ndetse abana bacu tubigishe Indangagaciro na kirazira.

Murekatete wari umushyitsi mukuru nawe muri uyu muhango yashimiye Ubuyobozi bw’Igihugu, agaragaza ko hari byinshi bimaze kugerwaho nyuma yo kuba umwe tukaba Abanyarwanda.

Yunzemo ko Imanza z’inkiko gacaca zitaracibwa ziraza kwihutishwa zirangire vuba, asaba abanyarwanda kwibuka biyubaka.

Mu karere ka Rutsiro habarurwa Inzibutso 8 zishyinguyemo imibiri y’abazize jenoside yakorewe Abatutsi Ibihumbi 22,375.

Please Post Your Comments & Reviews

Your email address will not be published. Required fields are marked *