M23 yavuze ko yihanangirije FARDC na FDLR mu gitero bayigabyeho

Abarwanyi b’Umutwe wa M23 bemeje ko Ingabo za Repubulika Iharanira Demokarasi ya Congo, FARDC, FDLR yiganjemo abakoze Jenoside bagahunga u Rwanda na Mai Mai Nyatura babagabyeho igitero gikomeye ariko bakabasubiza inyuma.

Iyo mirwano yahuje M23 na FARDC, FDLR, n’abandi barwanyi yabaye ku wa Gatatu w’iki cyumweru.

Amakuru aturuka muri Teritwari ya Rutshuru yemeza ko Ingabo za FARDC zifatanyije na Batayo ya FDLR yitwa CRAP iyobowe na Colonel Ruhinda ndetse na Mai Mai Nyatura bagabye ibitero ku birindiro bikuru by’Umutwe wa M23 hafi ya Cyanzu ku Kirunga cya Sabyinyo ku ruhande rwa RDC bitwaje intwaro zikomeye.

Iki gitero cyabaye nyuma y’uko M23 yari yatangaje ko ihagaritse imirwano ikanarekura ibice yari yafashe, igasubira mu birindiro byayo mu kwirinda ikavuga ko niterwa izitabara.

Abinyujije mu itangazo ryanyujijwe mu buryo bw’amashusho, Uuvugizi wa ARC (Armée Révolutionaire Congolaise), Major Willy Ngoma, yasobanuye ko ibitero uyu mutwe witwaje intwaro wagabweho byarimo na Mai Mai Nyatura, kandi ngo byagabwe ku birindiro byayo bine.

Ati “Tariki ya 1 Mata 2022 twashyize umukono ku cyemezo cyo guhagarika ibitero kugira ngo guverinoma itegure ibiganiro bigamije gukemura ikibazo mu mahoro. Twatunguwe no kubona FARDC, FDLR na Nyatura batugabyeho igitero ariko twabahaye isomo ku buryo birukanse nk’abasivili bata imbunda n’amasasu. Tuzakomeza kwirinda.’’

Major Willy Ngoma yakomeje avuga ko icyo bifuza ari amahoro ariko FARDC nikomeza kubashotora ibagabaho ibitero na bo bazakomeza kwirwanaho.

Nta mibare yatangajwe ku bashobora kuba baguye muri iyi mirwano cyangwa se ibintu byangirikiyemo.

Iyi mirwano yadutse nyuma y’uko hamaze iminsi havugwa ko muri iki cyumweru i Nairobi muri Kenya hari hateganijwe inama yagombaga guhuza abakuru b’ibihugu byo mu Karere ndetse n’Umuyobozi wa Politiki w’Umutwe wa M23 mu kurebera hamwe ikibazo cy’umutwe wa M23 n’uko cyakemuka burundu.

Please Post Your Comments & Reviews

Your email address will not be published. Required fields are marked *