Ishyirahamwe ry’umupira w’amaguru muri Afrika CAF ryatangaje amakipe 5 (Senegal, Cameroun, Ghana, Maroc na Tunisia) ko ariyo yabonye itike yo kuzahagararira Afurika mu mikino ya nyuma y’igikombe cy’Isi 2022 izabera muri Qatar kuva taliki 21 Ugushyingo kugeza 18 Ukuboza 2022.
CAF yavuze ko amakipe akurikirana ku buryo bukurikira:
- Senegal 1-0 Misiri (3-1)
- Algeria 1-2 Cameroun (2-2)
- Nigeria 1-1 Ghana (1-1)
- Maroc 4-1 RDC (5-2)
- Tunisia 0-0 Mali (1-0)
Aya makipe yabonye itike nyuma y’imikino yo kwishyura yabaye taliki 29 Werurwe 2022, ikipe ya Senegal yasezereye Misiri kuri penaliti 3-1 nyuma yo kunganya gitego 1-1 mu mikino yombi. Mu mukino ubanza, Misiri yatsinze Senegal igitego 1-0, mu mukino wo kwishyura Senegal na yo itsinda Misiri igitego 1-0.
Ikipe ya Cameroun yatsinzwe umukino ubanza na Algeria igitego 1-0 mu mukino wo kwishyura itsinda ibitego 2-1. Ku giteranyo Cameroun na Algeria zanganyije ibitego 2-2 ariko Cameroun ibona itike kuko yatsindiye ibitego byinshi (2) hanze.
Ikipe ya Ghana nyuma yo kunganya na Nigeria igitego 1-1 mu mukino wo kwishyura yahise ibona itike kubera igitego cyo hanze kuko mu mukino ubanza wabereye muri Ghana yari yanganyije na Nigeria 0-0.
Maroc yabonye itike biyoroheye nyuma yo gutsinda ikipe ya RDC ibitego 5-2 mu mikino yombi. Umukino ubanza Maroc na RDC zanganyije gitego 1-1, umukino wo kwishyura Maroc itsinda RDC ibitego 4-1.
Ikipe ya Tunisia na yo yabonye itike isezereye ikipe ya Mali ku gitego 1-0 mu mikino yombi. Umukino ubanza, Tunisia yatsinze Mali igitego 1-0 na ho uwo kwishyura aya makipe anganya 0-0.
Ikipe ya Senegal, Tunisia na Maroc zari mu mikino y’igikombe cy’Isi iheruka muri 2018 mu Burusiya naho Cameroun na Ghana zaherukagayo muri 2014 ubwo imikino yaberaga muri Brazil.
Mu mibare, Cameroun ni yo igiye kwitabira inshuro nyinshi ( 8), Tunisia Maroc ni inshuro ya 6, Ghana ni inshuro ya 4 naho Senegal ni inshuro ya 3. Ikipe zo muri Afurika zabashije kugera kure zagarukiye muri ¼ cy’irangiza, ikipe ya Cameroun muri 1990, Senegal (2002) na Ghana (2010).
