Pudence Rubingisa yagiriye uruzinduko rw’Akazi ku kirwa cy’Iwawa

Pudence Rubingisa, Umuyobozi w’Umujyi wa Kigali aherekejwe n’Abayobozi Nshingwabikorwa b’Uturere tugize Umujyi wa Kigali, baganirije abari gukurikirana amasomo y’ Igororamuco n’imyuga mu Kigo Ngororamuco cya Iwawa baturuka mu mujyi wa Kigali; babasaba kwiga neza amasomo bahabwa kuko ari imbaraga Umujyi wa Kigali utegereje mu iterambere.

Uru ruzinduko rw’Akazi rukozwe nyuma y’amezi abiri Urubyiruko rugororerwa muri iki Kigo kibarizwa ku Kirwa cya Iwawa rutangiye amasomo, kugira ngo babashe kumva ibibazo bahura nabyo bituma bamwe bisanga basubiye mu ngeso zibangamira sosiyete bakajyana kugororwa inshuro irenze imwe.

Ati “Twakoze uru ruzinduko ku kirwa mu rwego rwo gukurikirana Urubyiruko ruri kugororerwa muri iki kigo nk’uko tubifite mu nshingano. Turifuza ko amasomo bahabwa y’ubumenyingiro yazabafasha bageze hanze, ndetse natwe turashaka ko nibataha tuzabakira, bakazasanga twaranabashakiye imirimo dushingiye ku masomo bize.”

Rubingisa avuga ko mu myaka yashize basuraga uru rubyiruko rugiye gusoza amasomo y’igororamuco, ariko bakaba barasanzemo icyuho mu kubasubiza mu buzima busanzwe; none kuri ubu bakaba bahisemo kujya babasura bagitangira amasomo ngo bajye kubashakira ibizabafasha batashye kugira ngo batazatsikira bakisanga baguye mu makosa yatumye bajyanwa kugororwa.

 Abagororerwa mu Kigo Ngororamuco cya Iwawa baturuka mu mujyi wa Kigali ari nabo biganje ku kirwa cya Iwawa basabwe guhinduka by’ukuri no kuba intangarugero muri sosiyete kugira ngo igihe bazaba bamaze bigishwa kizabagirire akamaro.

Abagororerwa muri icyo kigo nabo bavuga ko ubuzima babayemo ari bwiza kuruta ubwo babagamo mu buzima bwo hanze. Bamwe muribo babwiye rwandanews24.rw ko amasomo barimo guhabwa azabafasha mu buzima busanzwe kuko bari baramaze kuba imbata y’ibiyobyabwenge ariko kuri ubu bakaba baramaze guhinduka.


Rugamba Furaha ati “Nafashwe nzira ikiyobyabwenge cya Mugo, nza Iwawa numvaga ko nje kujya nkubitwa buri munsi ariko nasanze atariko bimeze kuko baratwigisha kandi ubuzima tubayeho ni bwiza.”

Rugamba akomeza avuga ko bagenzi be basigaye mu biyobyabwenge nabo bakwiriye kuza kugororwa, kuko Iwawa umuntu abasha kwitekerezaho agahindura imyumvire n’imigirire. Ndetse yizeye ko nasoza amasomo y’igororamuco azasubira mu giturage yarabaye undi mushya.

Shema Pacifique wo mu karere ka Gasabo ati “Nazize ikiyobyabwenge cya Mugo, nzanwa kugororwa kandi ubu mfite ubuzima bwiza, mu gihe hanze nabagaho ubuzima bubi kuko nakoreshaga ibiyobyabwenge buri munsi.

Shema akomeza avuga ko ikiyobyabwenge cya Mugo abagikoresha kibatera kwikunda, kikabatandukanya n’umuryango, we akitangaho urugero ko cyatumye ajya kugororwa kandi amaze umwaka umwe arangije kaminuza mu ishami ry’amategeko, mu gihe yumvaga ko yagakomeje kwiga.

Ikigo cy’Igihugu Gishinzwe Igororamuco kivuga ko iyi gahunda yo gusura uru rubyiruko izakomereza no mubuyobozi bw’inzindi ntara bakabasha gukurikirana urubyiruko kuva ruhageze kuzageza rusoje amasomo y’igororamuco.
Mu Kigo Ngororamuco cya Iwawa hari kugororerwa abasaga 1900, akaba ari icyiciro cya 23, Umujyi wa Kigali ukaba ufitemo urubyiruko 497.

Kuva icyo kigo cyatangira gukora hamaze kugororerwa urubyiruko 28,897 utabariyemo ururi kugororwa uyu mwaka.

Pudence Rubingisa aherekejwe n’Abayobozi nshingwabikorwa b’Uturere tw’Umujyi wa Kigali, babaganirije abari kugororerwa Iwawa baturuka mu mujyi wa Kigali
Pudence Rubingisa yatanze impanuro ku rubyiruko ruri kugororerwa iwawa
Abagororerwa Iwawa akanyamuneza ni kose

Please Post Your Comments & Reviews

Your email address will not be published. Required fields are marked *