Zimwe mu ngamba zo gukumira ikwirakwira rya covid19 zakuweho mu Rwanda

Zimwe mu ngamba zo gukumira ubwandu bushya bw’icyorezo cya covid19 zirimo gupima umuriro aho abantu binjirira cyane ahahurira abantu benshi zakuweho kuri ubu gupima umuriro bikaba bitagifatwa nk’imwe mu ngamba zo gukumira ikwirakwira ry’icyorezo cya covid19.

Ibi byatangajwe na Minisiteri y’ubuzima ku gicamunsi cyo kuri uyu wa kane taliki ya 17 Werurwe 2022 mu itangazo yashyize ahagaragara.

Iri tangazo rigira riti: “Minisiteri y’Ubuzima iramenyesha Abaturarwanda bose ko gupima umuriro ku marembo y’ahahurira abantu benshi ko bitagikenewe ndetse ko bitakiri umwe mu ngamba zo kurwanya covid19.”

Iri tangazo rikomeza rivuga ko ibigo bya leta n’ibyabikorera bitegura inama zihuza abantu benshi zihagarika igikorwa cyo gupima umuriro.

Minisiteri y’Ubuzima yaboneyeho kwibutsa abaturarwanda bose ko bagomba kwikingiza inkongo zose bakanitabira gufata urukingo rwa gatatu rwo gushimangira, kwambara neza agapfukamunwa no gukara intoki neza bakoresheje amazi meza n’isabune cyangwa umuti wabugenewe wica udukoko (microbe).

Amakuru atangazwa na Minisiteri y’Ubuzima y’uko icyorezo cya covid19 gihagaze mu Rwanda, agaragaza ko abaturarwanda basaga miliyoni 8 n’ibihumbi Magana 800 aibo bamaze gufata doze ya mbere y ‘urukingo rwa covid19, abamaze gufata doze zombi basaga miliyoni 8 n’ibihumbi 10, naho abamaze gufata doze ishimangira basaga miliyoni 2 n’ibihumbi Magana 300 .

Please Post Your Comments & Reviews

Your email address will not be published. Required fields are marked *