Rubavu: Baratabariza Uwamahoro Sandrine ugiye kubyarira ku Muhanda

Uwamahoro Sandrine, w’imyaka 18 utwite inda y’imvutsi, nyuma y’uko uwo yabyaye bwa mbere yapfuye akimubyara aratabarizwa ni abaturage basaba ko yafashwa ntazabyarire ku muhanda. Ni mugihe Ubuyobozi bw’Akarere buvuga ko ikibazo cye butakizi.

Aba baturage batabarije Uwamahoro Sandrine bibaza impamvu agiye kubyarira ku muhanda kandi Igihugu kitabuze ubushobozi bwo gufasha abatishoboye.

Umuhozawase Aime Claudine wo mu mujyi wa Kigali ati “Uriya mwana naramubonye antera agahinda, kuko kubona umubyeyi ugiye kubyarira ku muhanda kandi Igihugu kitabuze abagiraneza n’ubushobozi. Akeneye gufashwa akabona iby’ibanze mubyo umubyeyi akenera.”

Jean Paul urara izamu ku muryango w’inzu yegeranye n’iyo uyu mwana w’umukobwa araraho ati “Arababaje cyane, ndetse biteye agahinda kubona umwana w’umukobwa watewe inda ntiyitabweho yirirwa yicira isazi mu maso, ndetse akaba agiye kubyarira ku ibaraza. Ibi bishobora kugira ingaruka kuwo azabyara tukaba dusaba Ubuyobozi ko bwamufasha.”

Aba bose icyo bahurizaho ni uko Ubuyobozi cyangwa abagiraneza bagira icyo bakora kugira Uwamahoro Sandrine afashwe.

Uwamahoro Sandrine mu kiganiro n’Umunyamakuru wa Rwandanews24 yavuze ko umwana atwite ari uwa kabiri, nyuma y’uko uwo yabyariye ku muhanda bwa mbere yapfuye nyuma y’amasaha 12 avutse.

Ati “Naje ku muhanda nyuma y’uko Papa yishe Mama bakamufunga tukabura ikidutunga, nagombaga gushakishiriza barumuna banjye nza ku muhanda, aho Papa afunguriwe yatubwiye ko natwe azatwica turasembera, ikibazo cyacu kizwi n’abaturanyi bo mu murenge wa Rugerero.”

Uwamahoro Sandrine ni mwene Habimana Eric, avuga ko yaje ku muhanda atangira yigira ikiragi ngo arebe ko yasaba akabona ikimutunga, nyuma baza ku muvumbura arateseka kugira abone icyo arya agashaka uwo baryana ari nabwo baje kumutera inda ya mbere afite imyaka 16 aho yabyaye saa sita z’ijoro uruhinja rupfa saa sita z’amanywa, ndetse kuri ubu akaba atazi inda atwite amezi ifite kuko atarabasha kujya kwa muganga kwipimisha kuko atagira Ubwisungane mu kwivuza.

Uwamahoro Sandrine asaba ko yafashwa kubona aho kuba n’ibikoresho by’ibanze byo kwita ku mwana atwite atagize aho ahurira na Se umubyara.

Ishimwe Pacifique, Umuyobozi w’Akarere ka Rubavu wungirije ushinzwe imibereho myiza avuga ko iki kibazo atakizi.

Ati “Icyo kibazo ntabwo tukizi, mwazadufasha mubonye uwo mubyeyi aryamye aho ngaho muvuga ko arara mukaduhamagara tugakurikirana ibibazo bye.”

Mu ijoro ryo ku munsi w’abagore ubwo Umunyamakuru wa Rwandanews24 yasangaga Uwamahoro Sandrine aryamye kurubaraza aho asanzwe arara mu masaha ya saa sita z’ijoro yagerageje guhamagara uyu muyobozi ariko ntiyabasha gufata terefone.

Si Uwamahoro Sandrine gusa ubayeho mu buzima bushaririye mu mujyi wa Gisenyi, Akagari ka Nengo kuko aho asanzwe arara, ahararana n’undi mubyeyi ufite uruhinja rw’umwaka n’igice.

Uwamahoro Sandrine aratabarizwa n’Abaturage bibaza impamvu agiye kubyarira ku muhanda kandi Igihugu kitabuze ubushobozi
Iyi foto yafashwe saa sita z’ijoro, aho Uwamahoro Sandrine ararana n’undi mubyeyi uhetse umwana w’umwaka n’igice
Ku ibaraza ry’ubucuruzi baryamaho, hateye agahinda

Please Post Your Comments & Reviews

Your email address will not be published. Required fields are marked *