Nyanza: RIB yataye muri yombi umuyobozi wa DASSO ukekwaho icyaha cya ruswa

Urwego rw’Igihugu rw’Ubugenzacyaha (RIB) rwataye muri yombi Umuyobozi wa DASSO mu Murenge wa Busasamana mu karere ka Nyanza akekwaho kwakira no kwaka ruswa.

Kuwa 12 Werurwe 2022 Urwego rw’igihugu rw’Ubugenzacyaha (RIB) rwataye muri yombi Umuyobozi wa DASSO mu Murenge wa Busasamana mu Karere ka Nyanza witwa Nsanzineza Gaheta akekwaho kwaka no kwakira ruswa y’amafaranga 50,000 y’u Rwanda .

Umuvugizi wa RIB Dr. Thierry B. Murangira yavuze ko ku bufatanye bwa RIB na Polisi yafashwe agerageza guhisha ayo mafaranga yaramaze kwakira.

Ati“Mu ibazwa rye ry’ibanze Gaheta abajijwe impamvu yatse akanakira ayo mafaranga yasubije yuko ari ruswa yahawe ngo ajye aburira umuturage igihe inzego z’umutekano zije gusaka inzoga zitemewe(igikwangari) n’amategeko.”

Umuseke dukesha iyi nkuru wanditse ko Gaheta ukekwaho kwaka ruswa no kuyakira ubu acumbikiwe kuri RIB station ya Busasamana.

Umuvugizi wa RIB yavuze ko ukekwaho kwaka no kwakira ruswa urukiko ruramutse rumuhamije icyaha yahabwa igihano cy’igifungo kiri hagati y’imyaka itanu n’irindwi hiyongereyeho n’ihazabu y’amafaranga y’u Rwanda yikubye inshuro kuva kuri eshatu kugera kuri eshanu z’agaciro k’indonke yatse cyangwa yakiriye.

Please Post Your Comments & Reviews

Your email address will not be published. Required fields are marked *