Imiyoboro y’amashanyarazi ije gusimbura ishaje, Rubavu ijyane n’icyerecyezo cy’igihugu-Dr. Ernest Nsabimana

Ibi Dr. Ernest Nsabimana, Minisitiri w’Ibikorwaremezo yabitangarije mu karere ka Rubavu, ubwo yari kumwe na Nyakubahwa H.E Bert Versmessen, Ambasaderi w’Ububirigi mu Rwanda, bataha ku mugaragaro ibikorwa remezo byubatswe mu mushinga wo kongerera imbaraga imiyoboro ikwirakwiza amashanyarazi muri aka karere, watewe inkunga n’Ubwami bw’Ububirigi.

Uyu muhango wabaye kuri uyu wa gatandatu, tariki 12 Werurwe mu karere ka Rubavu, aho batashye ibi bikorwa bagaragaza ko Umuriro w’Amashanyarazi wavuye kuri Kv 6.6 ukagera kuri Kv 30, ibintu byanejeje abatuye umujyi wa rubavu.

Dr. Tuganeyezu Oreste, Umuyobozi w’ibitaro bya Gisenyi avuga ko kuba Umuriro w’amashanyarazi wiyongereye bije gukemura ibibazo byinshi byibandaga ku mitangire ya Serivisi.

Ati “Twagiraga ikibazo cy’ibura ry’umuriro rya hato na hato bigatuma hari imashini zimwe zikoreshwa mu buvuzi zipfa, ariko ubu ubwo umuriro wabaye mwinshi ntizizongera kwangirika, kandi imitangire ya serivisi igiye kurushaho kuba myiza mu bitaro bya Gisenyi.”

Ambasaderi w’Ububirigi mu Rwanda Beet Versmessen yavuze ko hubatswe imiyoboro miremire ifasha abaturage ibihumbi 250 kubona amashanyazi akaba ari ishema ku gihugu cye.

Ati “Ibirometero bisaga 1,000 by’imiyoboro byarubatswe ibindi byongererwa imbaraga muri uyu mushinga, Abaturage basaga 250,000 batari bafite amashanyarazi barayabonye kandi barayakoresha. Uyu ni umusaruro ufatika werekana ishusho ngari y’ibigenda bigerwaho mu myaka mike ishize, u Rwanda rukomeje gutera intambwe ishimishije mu gukwirakwiza amashanyarazi.”

Minisitiri w’Ibikorwaremezo, Bwana Dr. Ernest Nsabimana yavuze ko iyi miyoboro ije gusimbura iyari ishaje kugira ngo Rubavu nk’umugi wunganira Kigali ujyane n’icyerecyezo cy’igihugu.

Ati “Muri aka karere ibikorwa remezo by’amashanyarazi byari bihari n’ibya kera, imiyoboro yari ihari yatangiranye n’uruganda rwa Bralirwa muri 1958 ku buryo habaga kubura kw’amashanyarazi rimwe na rimwe ibintu bitajyanye n’umugi wunganira Kigali, ubu haje ibishya bijyanye n’icyerecyezo cy’Igihugu ku buryo ibyo kubura umuriro n’insinga zishaje bitazongera kubaho, ku buryo amahoteri n’inganda zigiye kubakwa ibitaro bya Gisenyi nta kibazo cy’amashanyarazi bizahura nacyo’’.

Dr. Ernest Nsabimana, Minisitiri w’Ibikorwaremezo

Uyu mushinga watewe inkunga ingana na Miliyoni 39 z’amayero yakoreshejwe muri gahunda yo gukwirakwiza amashanyarazi.

Akarere ka Rubavu kari ku kigero cya 91% cy’abaturage bagerwaho n’amashanyarazi, mu gihe mu bikorwa Perezida wa Repubulika yemereye Abaturage ubwo yiyamamazaga muri 2017 yabasezeranyije ko muri 2024 amashanyarazi azaba yabagezeho ku kigero cya 100%.

Kuri ubu mu Rwanda ingo zifite amashanyarazi mu zirasaga 68.48%.

Umuriro w’Amashanyarazi wari usanzwe ukoreshwa mu karere ka Rubavu wavuye kuri Kv6.6 ugera kuri Kv 30
Ambasaderi w’Ububirigi mu Rwanda Beet Versmessen yavuze ko hubatswe imiyoboro miremire ifasha abaturage ibihumbi 250 kubona amashanyazi akaba ari ishema ku gihugu cye
Cabine nshyashya ikoresha Kv 30 yasimbuye iyari ishaje
Cabine ishaje yakoreshaga Kv 6.6

Please Post Your Comments & Reviews

Your email address will not be published. Required fields are marked *