Rutsiro-Ngororero: Abaturiye inzuri za Gishwati barasaba Perezida Kagame Imihanda

Abaturage bakorera ubworozi mu nzuri za Gishwati mu turere twa Rutsiro na Ngororero barasaba Umukuru w’Igihugu kubagezaho imihanda kuko batabona uko bageza umusaruro ku isoko, ndetse n’ubashije kugurishwa bagahendwa. Ni mu gihe Ubuyobozi bw’Akarere ka Rutsiro buvuga ko iki kibazo bukizi bakizeza abaturage ko iyi mihanda izakorwa ariko bitari vuba.

Aba baturage biganjemo abororera ni abahinga mu nzuri za gishwati bose icyo bahurizaho ni uko Umusaruro w’Ibirayi ni uw’Amata biboneka ariko ntibigire agaciro.

Bati “Umusaruro w’Amata mu nzuri za Gishwati aborozi babuze uko bawugeze kw’Isoko kubera amakusanyirizo (MCCs) bubakiwe na Leta adakora neza, kubera ikibazo cy’imihanda bahisemo kuyakoramo formage kuko usanga Litiro igurishwa amafaranga 80Frw mu gihe cy’imvura, naho mu gihe cy’izuba Litiro y’amata ikagurishwa amafaranga 120Frw, ikintu babona kibatera guhomba bitewe n’ibyo baba batakaje.”

Undi ati “Imihanda ikozwe byafasha n’Uruganda Inyange kujya ruza gutwara amata y’Aborozi bo muri Gishwati, kuko rwaranagerageje kuza imihanda biranga, ndeste n’Umusaruro w’ibirayi wajya ubasha kugezwa ku isoko ku buryo bworoshye.”

Ahiganje ibibazo by’imihanda bikibangamiye Abaturage ni mu mirenge ya Muhanda na Kavumu mu karere ka Ngororero, ndetse n’umuhanda ugana ku ikusanyirizo rya Gatare mu Mumurenge wa Nyabirasi mu karere ka Rutsiro.

Ikusanyirizo rya Gatare ryo mu murenge wa Nyabirasi biragoye kurigeraho kubera ikibazo cy’imihanda mibi

Abaturage bavuga ko mu ngaruka nyinshi bahura nazo zo kutagerwaho n’Imihanda mizima ziganjemo:

1. Umusaruro ntubona uko ugezwa ku isoko ku buryo bworoshye, bisaba gukoresha kwikorera ku mutwe.

2. Bagurisha ku giciro gitoya ugereranyije n’ibyo baba bashoye.

3. Bituma aborozi batitabira korora kijyambere kuko nta soko ry’umusaruro.

3. Abashumba bata inka kuko bakora ibirometero byinshyi bagiye gushaka ababagurira amata yabo.

4. Abahaturiye Nta mushinga w’iterambere bahakorera kubera ko imihanda itagendwa

Havugimana Etienne, Umuyobozi w’Akarere ka Rutsiro wungirije ushinzwe iterambere ry’Ubukungu avuga ko ikibazo cy’imihanda yo mu nzuri za Gishwati bakizi nubwo itazakorwa vuba kubera ubushobozi.

Ati “Ikibazo cy’imihanda yo mu nzuri za Gishwati kirazwi, ariko izasaba inyigo ndetse n’Ubushobozi, tukaba tuzakomeza gukora ubuvugizi ngo turebe ko ubushobozi bwaboneka imihanda ikorwe, ndetse turizeza abaturage ko izakorwa ariko ntibiri mu igenamigambi ry’uyu mwaka ariko bakwiriye kuba bihanganye.”

Mu karere ka Rutsiro na Ngororero hakunze kurangwa imihanda mibi itorohereza abaturage kugeza Umusaruro ku isoko, ibi bigatuma abenshi bavuga ko mbere yo gukora inyigo yo kubaka ibikorwa remezo nk’amakusanyirizo aba yatwaye leta akayabo ariko ntakoreshwe icyo yagenewe hajya hanabanza kurebwa ku mihanda.

Ikusanyirizo rya Ndamira naryo riri muri Gishwati
Ikusanyirizo rya Nyirabihururu
Ubuhunikiro bw’Ikigo RAB bwubatswe muri Gishwati Imodoka zihagera bigoranye iyo imvura yaguye
Hari aho imihanda itakiri nyabagendwa, ku buryo ni abanyamaguru bashobora kugagirira impanuka
Abakozi bo mu makusanyirizo yo muri Gishwati barimo batunganya Amata akurwamo Foromage kuko agaciro k’Amata kari hasi

Please Post Your Comments & Reviews

Your email address will not be published. Required fields are marked *