Nyamagabe-Uwinkingi: Bavuga ko umuhanda wabo utunganyijwe ingendo zaborohera

Abakoresha umuhanda uva ku Kitabi werekeza mu kagali ka Rugogwe bavuga ko bahendwa n’ingendo kubera ko udatunganyije bigatuma abavandimwe babo batuye mu tundi turere batabasura bitewe n’uko nta modoka ijyayo n’ibiciro bya moto bikaba biri hejuru nk’uko babibwiye Rwandanews24. Ubuyobozi bw’aka karere buvuga ko ikibazo cy’uyu muhanda bukizi kandi ko imirimo yo kuwutunganya yatangiye abagifite ikibazo ari abo mu bice ikorwa ryawo ritarageraho.

Uyu muhanda ufite ibirometero bigera ku 10 uhuza umurenge wa Kitabi na Uwinkingu, abawukoresha bavuga ko kuva kuri kaburimbo kugera aho batuye mu mudugudu wa Rugeti bishyura amafaranga angana n’ibihumbi 2500frws kandi nabwo ntabwo ari abamotari bose bemera kujyayo.

Cyondi Emmanuel atuye mu mudugudu wa Rugeti akaba akoresha uyu muhanda. Ati: “Ubundi keretse Umubyeyi wacu Perezida Kagame amenye ko dutuye ahantu nk’aha tutagerwaho n’abavandimwe n’inshuti kubera umuhanda mubi. Njyewe nzi abantu benshi batazi aho ibiro by’akarere biba kubera ko ari kure kandi n’itike yo kugerayo ikaba yatunga umuntu igihe cy’ukwezi ubaze kugenda no kugaruka ntabwo itike iri munsi y’ibihumbi 10.000frws.”

Iyo imvura yaguye nta moto yemera kugenda muri uyu muhanda (Foto: Annonciata Byukusenge)

Mugenzi we Nyandwi Seraphine ati: “Niba uyu muhanda wari mubi byibura ugeramo n’imodoka ibya kaburimbo ntacyo byaba bitubwiye. Kugirango ugere kuri kaburimbo ujyanye umurwayi ku bitaro ku Kigeme bisaba itike itari munsi y’ibihumbi 8.000frws ku muntu umwe, bitewe n’uko ari ugutega moto. Imodoka zigarukira mu Gasarenda, inaha ntabwo zihagera.”

Amakuru Rwandanews24 yamenye ni uko imodoka zitwara abagenzi zitarenga Gare ya Gasarenda, umuntu ufite urugendo ruharenga atega moto cyangwa imodoka z’abantu ku giti cyabo iyo ubonye igiye mu kerekezo ujyamo.

Bamwe mu bamotari bakoresha uyu muhanda baganiriye na Rwandanews24 bavuga ko mu bice byo hirya ya kaburimbo ku Kitabi, ukorerayo ari utahayo cyangwa uwo umugenzi yemeye guha amafaranga menshi atamushyira mu gihombo. Ati: “Mbere risansi itarurira kuva Kitabi ujya Rugeti twahagenderaga ibihumbi 2000frws bitewe n’aho umugenzi utwaye agarukira, ariko ubu risansi yaruriye litiro turimo kuyigura amafaranga 1400frws, rero ntabwo wajyanayo umuntu ku mafaranga 1400frws cyangwa 1500frws ngo bikunde kuko ni kure.”

Iyo imvura yaguye igiciro cy’urugendo kuri moto kiriyongera (Foto: Annonciata Byukusenge)

Mugenzi we utwara abagenzi kuri moto we yagize ati: “Nubwo risansi ihenze, ariko harimo kaburimbo ntabwo ayo mafaranga yageramo kuko moto ntiyakwangirika. Ikindi ni uko tujyanayo abavuye hano kuri kaburimbo, ariko ntabwo umuntu uriyo yahamagara moto ngo imusangeyo imuzane za Kitabi, Gasarenda cyangwa mu Mujyi I Nyamagabe ngo hagire ujyayo bitewe n’uko yahomba kandi ukurikije uko hameze amafaranga waca umugenzi nawe ntiyayatanga. Abantu bo muri biriya bice ntibakunda gutega kuburyo wavuga ko ujyanyeyo umugenzi ngo ugire uwo ugarukana, rero bituma igiciro kiyongera rwose”

Bavuga ko byibura umuntu ahamagaye umumotari ngo ajye kumufata I Rugeti amujyane mu Mujyi I Nyamagabe bamuca amafaranga ibihumbi 10.000frws bitewe n’aho amukuye. Ariko ngo aramutse akuye umugezi ahubatse urusengero rw’aba Baptiste yamuca amafaranga ibihumbi 6.000frws.

Mu kiganiro kihariye Umuyobozi w’Akarere ka Nyamagabe wungirije ushinzwe Ubukungu Bwana Habimana Thaddée yagiranye na Rwandanews24 yagize ati: “Ni umuhanda uhuza umurenge wa Kitabi na Uwinkingi, twatangiye kuwukora kugirango abaturage bawukoreshe umeze neza. Birashoboka ko abaturage ba Rugeti abakora umuhanda batarahagera.”

Abajijwe kuba ibinyabiziga bitahagera kubera ububi bw’umuhanda yagize ati: “Mu gihe uyu muhanda utararangira baba bakoresha uwamaze kurangira wo ku ishyamba ahazwi nka Subukiniro werekeza Rugogwe kandi naho ni hafi haragendeka.”

Akarere ka Nyamagabe gafite intego y’uko buri mwaka kazajya kubaka umuhanda ku mafaranga kazajya gakura ku ngengo y’imari mu rwego rwo kwegereza abaturage ibikorwaremezo no gusana ibyangiritse.

Abatuye mu kagari ka Rugogwe ngo ntibakunda gukora ingendo kubera igiciro gihanitse giterwa n’umuhanda udakoze neza (Foto: Annonciata Byukusenge)

Please Post Your Comments & Reviews

Your email address will not be published. Required fields are marked *