Rulindo: Abanyeshuri 30 bakubiswe n’inkuba

Inkuba yakubise Ishuri ry’Urwunge rw’Amashuri rwa Gihinga mu Karere ka Rulindo, yangiza ibirimo inyubako ndetse n’abanyeshuri bane bajyanwa mu bitaro.

Abanyeshuri 30 nibo bakubiswe n’inkuba kuri iri shuri rya GS Gihinga riherereye mu Kagari ka Budakiranya mu Murenge wa Kinzuzi muri aka karere ka Rulindo.

Ahagana saa Tatu z’igitondo cyo kuri uyu wa Gatatu taliki 23 Gashyantare 2022, imvura nke yaguye muri aka gace ishuri riherereyemo yatumye inkuba zikubita.

Umwarimu wigisha kuri GS Gihinga yavuze ko iyi nkuba yakubise inyubako enye zigirwamo n’abanyeshuri, inyubako ikoreramo ibiro by’ubuyobozi bw’ishuri ndetse inangiza amashanyarazi.

Ati “Abana yari yakubise abagera kuri 30 ariko imbangukiragutabara yahise ize ibajyana kwa muganga, abandi bana bari basigaye mu kigo barimo kwitabwaho na bagenzi babo bafatanyije n’abarezi ndetse n’ubuyobozi bw’ikigo.”

Mu masaha y’igicamunsi abanyeshuri bane bakubiswe n’inkuba nibo bari bari kwitabwaho n’abaganga mu Bitaro Bikuru by’Akarere ka Rulindo, biri i Rutongo.

Amakuru yavugaga ko umwana umwe ariwe urembye cyane mu gihe abandi batatu barimo uwiga mu mashuri abanza na babiri bo mu mwaka wa kabiri w’amashuri yisumbuye bo barimo koroherwa nk’uko Igihe dukesha iyi nkuru cyabyanditse.

Urwunge rw’Amashuri rwa Gihinga, ni ishuri ryigisha kuva ku cyiciro cy’incuke, amashuri abanza ndetse n’ayisumbuye, icyiciro rusange.

Please Post Your Comments & Reviews

Your email address will not be published. Required fields are marked *