Nyamagabe: Abakoresha Gare ya Gasarenda barasaba ko bafashwa no mu mvura igakoreshwa

Abakoresha Gare ya Gasarenda barasaba ko bafashwa igatunganywa kuko iyo imvura yaguye ntawe ubasha kwinjiramo bitewe n’uko iba yuzuyemo amazi kandi ikaba idafite aho abagenzi bashobora kugama igihe imvura iguye nk’uko babibwiye Rwandanews24.

Iyi gare iherereye mu murenge wa Tare mu karere ka Nyamagabe iyo imvura iguye ntushobora kubonamo umugenzi n’umwe n’ubwo yakuba harimo abarenga mirongo 50 kuko bose bahita basohoka bakajya kugama hanze yayo.

Bamwe mu baganiriye na Rwandanews24 bagira bati: “Muri Gare ya Gasarenda ntihari ikibazo cy’uko huzuramo amazi gusa, ahubwo ntinubakiye kuko urabona ko nta muntu n’umwe urimo kuko ntaho kugama hahari. Turifuza ko n’ubwo yaba itarashyirwamo icyatuma ayamazi atareka, ariko baduha aho kugama.”

Mukamana wari utegereje imodoka yerekeza mu Mujyi wa Nyamagabe we avuga ko babona kuba gare itubakiye bigira uruhare mu kubura kw’imodoka muri aka gace. Ati: “Uretse ku minsi y’isoko ubundi hano hakorera ikigo kimwe cy’ubwikorezi bw’abantu kandi nabwo ntabwo uko ukeneye kugenda uyibona kuko hasimburana 2 gusa. Njyewe mbona banenga uko iyi gare imeze kandi imodoka zabo zishobora gukomeza zikajya no mu mujyi wa Huye bakaba banga ko zagenda zuzuye ibyondo.”

Umuturage wo mu murenge wa Tare iyi Gare iherereyemo we avuga ko ikibazo cyayo Atari icy’ubu kuko ayizi ariko imeze. Ati:”Ugeze muri Gare ya Gasarenda imvura yaguye ushobora kugirango yangijwe n’ibiza byatewe n’imvura, ariko siko biri kuko iyi gare yamye yubatse nabi. Mu gihe cy’imvura yuzuramo amazi naho mu gihe cy’izuba haba harimo ivimbi rirenze urugero. Iyo moto itambutsemo cyangwa bakije imodoka ngo ihaguruke ugirango ni igihu cyabuditse.”

Abakoresha iyi gare bifuza ko yakubakwa kuko hari abasubika kugenda n’imodoka iyo imvura yaguye bafite gahunda yo gutaha ubukwe cyangwa kwitabira ibindi birori kuko ngo baba barimbye bigatuma bagenda banyagirwa bateze moto.

Iyo imvura yaguye abagenzi basohoka muri gare bakajya kugama hanze yayo kuko badafite aho kugama (Foto: Annonciata Byukusenge)

Mu kiganiro kihariye Umuyobozi w’akarere ka Nyamagabe wungirije ushinzwe Ubukungu Bwana Habimana Thaddée yagiranye na Rwandanews24, yavuze ko iki kibazo bakizi kandi barimo kugishakira umuti mu buryo burambye.

Ati: “Ibyo abakoresha iyi gare bavuga biragaragara kandi ikibazo turakiza, rero ntabwo tuzashaka uburyo itakongera kurekamo amazi nk’uko babivuga, ahubwo turimo gutegura kuyubaka ikibazo cyayo kigakemuka ku buryo burambye.”  

Abajijwe niba ari umuterankunga uzabafasha mu mirimo yo kuyubaka yagize ati: Oya. Akarere nitwe tuzayiyubakira, tukaba tuzayubaka mu ngengo y’imari y’umwaka utaha wa 2023.

Ubusanzwe ikigo gitegerwamo imodoka zitwara abagenzi mu buryo bwa rusange usanga kirimo inyubako zicururuzwamo ibintu bitandukanye abantu bakenera n’ubucuruzi bw’ingeri zose, iyi gare ntabwo wabonamo na kimwe ariko ubuyobozi buratanga icyizere ko bizajyamo iyi gare imaze gusanwa neza.

Please Post Your Comments & Reviews

Your email address will not be published. Required fields are marked *