Rutsiro: Kutagerwaho n’Amashanyarazi imbarutso yo kudindira mu iterambere

Bamwe mu baturage bo mu karere ka Rutsiro, Umurenge wa Manihira bavuga ko kutagerwaho ni amashanyarazi, ibi byabaye imbarutso yo gusigara inyuma mu iterambere. Ubuyobozi bw’Umurenge buvuga ko iki kibazo bukizi ndetse bwiteze ko kizakemuka bitarenze 2024.

Aba baturage abaganiriye na RWANDANEWS24 bavuga ko basigaye inyuma mu iterambere kubera ko Umuriro utarabasha gukwira hose, ndetse n’Urubyiruko rwo muri uyu murenge rukaba rutabasha kubona uko rwihangira imirimo rukaba rwaheze mu bwigunge.

Ntawuyirinda Jean Pierre yagize ati “Amashanyarazi ntarabasha kugera hose, kuko ni aho ari adafite ingufu, ibi bigira ingaruka ku kuba urubyiruko tutabona uko twihangira imirimo ngo (Ku ma santere ariho umuriro usanga hari abasudira, abogosha ni abakora ibindi).”

Ntawuyirinda akomeza avuga ko kubera ikibazo cy’amashanyarazi urubyiruko hafi ya rwose rutunzwe n’ubuhinzi. Agasaba Ubuyobozi kubafasha bakagezwaho iterambere nk’uko ni ahandi ryahageze.

Mbitsemenshi Patricie ati “Hari imidugudu myinshi itarageramo amashanyarazi abayituye babayeho mu bwigunge, usanga Urubyiruko cyangwa abanyeshuri bagakwiriye gusubiramo amasomo mu ijoro bidakunda kandi basabwa gutsinda nk’abandi bana bafite Amashanyarazi. Tukaba dusaba ko natwe umuriro wakwirakwizwa hose maze ababasha gukora bagakirigita ifaranga, kuko abataragerwaho nayo basigaye inyuma mu iterambere.”

Nzaramba Kayigamba, Umunyamabanga nshingwabikorwa w’umurenge w’agateganyo yemeza ko umurenge ayobora ukirangwamo ibibazo by’amashanyarazi atarakwirakwizwa hose, ariko umwaka wa 2024 uzasiga iki kibazo cyarabaye amateka.

Ati “Haracyarangwa ikibazo cy’Amashanyarazi muri uyu murenge kuko bigoye ko ibikorwa byabonekera rimwe, hari imidugudu umuriro utarageramo, ariko kubera bisaba ubushobozi burenze Umurenge twagerageje gukora Ubuvugizi ku rwego rw’Akarere ndetse ikibazo nabo barakiz, tukaba twizeye ko 2024 izagera iki kibazo cyarakemutse.”

Nzaramba nawe ahamya ko aya mashanyararazi kuba atarabasha kugera ku baturage bose, bigira uruhare mu mibereho mibi yabo, kuko aho amashanyarazi yageze haba hageze iterambere n’ibikorwa byo guhanga imirimo bikomeza kwiyongera.

Umurenge wa Manihira ufite ingo ibihumbi 4,329, muri zo izidafite amashanyarazi ni ingo 2,725.

Imibare igaragaza ko 62,94%  by’Ingo zigize umurenge wa Manihira zidafite Umuriro w’amashanyarazi, ni mu gihe gahunda y’Imyaka irindwi y’Ibikorwa Umukuru w’Igihugu Paul KAGAME yemereye abaturage ivuga ko bitarenze 2024 buri muturage azaba acana Umuriro w’Amashanyarazi.

Nzaramba Kayigamba, Umunyamabanga nshingwabikorwa w’umurenge w’agateganyo yemeza ko umurenge ayobora ukirangwamo ibibazo by’amashanyarazi
I Santere ikomeye y’Ubucuruzi ya Muyira nayo umuriro uyirangwamo bivigwa ko udafite ingufu zihagije

Please Post Your Comments & Reviews

Your email address will not be published. Required fields are marked *