Ruhango: Abantu bitwaje intwaro gakondo batemye abantu 5

Abantu bataramenyekana bitwaje intwaro gakondo bitwikiriye ijoro batema abaturage 5 bajyanwa mu Bitaro.

 Itemwa ry’aba baturage ryabaye mu ijoro ryo ku cyumweru taliki ya 13 Gashyantare 2022 ubwo hagwaga imvura nyinshi.

Amakuru avuga ko abo bagizi ba nabi baje bitwaje intwaro gakondo n’inkoni bakinguza abaturage bo mu Mudugudu wa Nyarugenge na Gishari, mu Kagari ka Gisanga batangira kubatema abandi barabakubita bikabije.

Umwe mu baturage babonye abo bagizi ba nabi yabwiye UMUSEKE ko abatemwe bahise babatabara. Ati ”Twahise tubajyana mu Bitaro bya Kinazi, inzego z’Ubugenzacyaha zatangiye gukora iperereza dutegereje ibizavamo.”

Gusa abaturage bavuga ko mu bantu 5 batemwe, batatu muri bo ari bo bakiri mu bitaro, babiri baraye batashye nyuma yo kubavura.

Usibye gutemwa no kugubitwa, aba baturage bavuga ko bambuwe amafaranga, telefoni n’ibikoresho byo mu rugo.

Umuyobozi w’Akarere ka Ruhango Habarurema Valens, yabwiye itangazamakuru ko nta makuru afite y’iri hohoterwa, kuko nta raparo yayo yigeze ahabwa. Habarurema abinyujije mu butumwa bugufi, yahakaniye Umunyamakuru avuga ko ntabyabaye. Yagize ati ”Iyo info ntabwo ariyo rwose good night.”

Umuntu yakwibaza uburyo inzego z’ubugenzacyaha n’iz’ibanze zagera ahabereye ubugizi bwa nabi hakanatangira gukorwa iperereza kuri ubwo bugizi bwa nabi, hanyuma Umuyobozi w’Akarere ntahabwe raporo y’ibyahakorewe.

Abatuye mu Kagari ka Gisanga bavuga ko iki kibazo gishobora kuba cyambukiranyije kikagera no mu kandi Kagari ka Kabuga ko mu Murenge wa Mbuye.

Please Post Your Comments & Reviews

Your email address will not be published. Required fields are marked *