Rubavu: Mudende idenderejwe n’Umusaruro w’Ubuhinzi ntibatanzwe muri Mutuelle

Ubuyobozi bw’Akarere ka Rubavu bwashimiye Umurenge wa Mudende wamaze kwesa umuhigo wo kwishyura Ubwisungane mu kwivuza 2021-2022 ku kigero cya 100% bunakangurira abaturage kurushaho kwitabira kwishyura ubw’umwaka utaha wa 2022-2023. Ubuyobozi bw’Akarere buvuga ko umurenge wa Mudende udenderejwe n’umusaruro ushimishije ukomoka ku buhinzi ariwo ufasha abawutuye kwishyura Ubwisungane mu kwivuza.

Abaturage bo mu murenge wa Mudende bavuga ko Ubwisungane mu kwivuza butaraza bagorwaga no kwishyura Ibitaro mu gihe bahuye n’uburwayi, none kuri ubu bakaba bizigama ngo babashe kwesa umuhigo.

Nshuti Vincent ati “Mutuelle itaraza twagorwaga no kwivuza kuko buri muturage yirwarizaga mugihe ahuye n’uburwayi, none kuri ubu tubasha kwizigamira binyuze mu bimina, tukajya dutanga igiceri umwaka ugashira twamaze kwishyura ndetse twahize ko bitarenze ukwezi kwa gatatu, turaba twageze 100%, mutuelle twayigize iyacu buri muturage ayumva nkiye nicyo kidufasha kwesa imihigo bidasabye ko Ubuyobozi bwirirwa bubiruka inyuma.”

Mukasine Gloriose, uhagarariye Abajyanama b’Ubuzima mu kagari ka Mirindi ho muri Mudenda ati “Twarabanje igikorwa cya Mutuelle tukigira icyacu, ngo tujye no gukangurira abandi kwishyura twebwe twarasoje, dufashwa no kwibumbira mu matsinda n’Ibimina tukajya dutanga Igiceri kimwe ku buryo n’uyu munsi tugeze kure twishyura ubwisungane bw’umwaka wa 2022-2023.”

Aba baturage bose icyo bahurizaho kijya kibabera imbogamizi rimwe na rimwe ni igihe bahinze Ibirayi bigafatwa n’uburwayi, bagorwa no kwesa umuhigo ku gihe biyemeje, ariko ku bufatanye n’Inzego z’ibanze babigeraho.”

Kambogo Ildephonse, Umuyobozi w’Akarere ka Rubavu avuga ko Umurenge wa Mudende uri muy’imbere yishyuye Mutuelle ku gihe mu rwego rw’Igihugu, bishingira ku musaruro ukomoka ku buhinzi babona, ndetse no kuba bafite abaturage bumva gahunda za Leta uko bikwiriye.

Ati “Mureza, mufite byose bibafasha kwesa imihigo, ndetse mwatanze isomo rikomeye ku rwego rw’Igihugu muri mu mirenge mike yabashije kwesa uyu muhigo, ninayo mpamvu twazanye n’Abayobozi b’Imirenge yose igize akarere ka Rubavu ngo baze bigire kuri Mudende, twasanze abaturage bose bumva akamaro ka Mutuelle de Sante, tukaba twifuza ko imirenge yose yatera ikirenge mu cya Mudende tukazasoza Umwaka bose barasoje.”

Kambogo akomeza avuga ko Abayobozi bose bagomba gushyira mu ngiro ibyo basabwa, bagaha Umuturage Serivisi nziza kandi inoze, ku buryo ibyo Umuturage akeneye abibonera ku gihe ndetse Umuturage abashe kubaho neza.

Umurenge wa Mudende wahize iyindi mu karere ka Rubavu, uyu muhigo uwuhuje n’indi itageze kuri 5 mu Gihugu. Ni mu gihe umurenge uza ku mwanya wa nyuma mu karere ka Rubavu warengeje ikigero cya 85% ndetse ukaba uza no mu myanya y’imbere ku rwego rw’Intara y’Iburengerazuba.

Umurenge wa Mudende weseje umuhigo wa mutuelle ku kigero cy’i 100%
Kambogo Ildephonse, Umuyobozi w’Akarere ka Rubavu avuga ko kuba Umurenge wa Mudende uri muy’imbere yishyuye Mutuelle ku gihe ku rwego rw’igihugu, bishingira ku musaruro ukomoka ku buhinzi beza, ndetse no kugira abaturage bumva gahunda za Leta
Abanyamabanga nshingwabikorwa b’Imirenge y’Akarere ka Rubavu bari baje kwigira kuri Mudende

Please Post Your Comments & Reviews

Your email address will not be published. Required fields are marked *