Dr Nsanzimana Sabin yagizwe Umuyobozi w’Ibitaro

Dr. Nsanzimana Sabin uherurka guhagarikwa ku buyobozi bw’Ikigo cy’Igihugu cy’Ubuzima (RBC), yagizwe Umuyobozi Mukuru w’Ibitaro bya kaminuza bya Butare biherereye mu Karere ka Huye, nk’uko bigaragara mu ibaruwa yandikiwe na Minisitiri w’Intebe ku wa Kane taliki ya 3 Gashyantare 2022.

Perezida wa Repubulika y’u Rwanda Paul Kagame yabaye ahagaritse Dr Nsanzimana Sabin ku mwanya w’Umuyobozi Mukuru wa RBC guhera taliki 7 Ukuboza 2021, nk’uko byagaragaye mu itangazo ryashimangirga ko hari ibyo yagombaga kubazwa akurikiranwyeho.

Inama y’Abaminisitiri yateranye ku wa 26 Mutarama 2022, Dr. Nsanzimana yasimbujwe Prof Claude Mambo Muvunyi ku mwanya w’Umuyobozi Mukuru wa RBC ndetse kuri uyu wa Kane abo bayobozi bombi bahererekanyije ububasha.

Dr Sabin Nsanzimana yagizwe Umuyobozi Mukuru wa RBC mu mpera za Nyakanga mu mwaka wa 2019, akaba yari amaze imyaka ibiri kukuri uyu mwanya yasimbuyeho Dr Condo Umutesi Jeanne wakiyoboraga kuva muri Gashyantare 2016.

Dr. Sabin nk’inararibonye mu bkurwanya SIDA n’ibindi byorezo, yari Umuyobozi w’Ishami rishinzwe kurwanya Sida n’izindi ndwara zandurira mu mibonano mpuzabitsina muri RBC mbere y’uko agirwa Umuyobozi Mukuru.

Ni umuganga w’inzobere mu guhangana n’icyorezo cya SIDA. Afite impamyabumenyi y’icyiciro cya gatatu cya kaminuza (Masters) mu bijyanye no kurwanya ibyorezo (Clinical Epidemiology) yakuye muri Kaminuza Nkuru y’u Rwanda.

Afite kandi impamyabumenyi y’Ikirenga mu bijyanye no guhangana n’ibyorezo (Philosophy in Epidemiology) yakuye muri Kaminuza ya Basel mu Busuwisi.

Ni umwe mu bahuguwe n’Ikigo Nyafurika cy’Ubumenyi (African Scientific Institute/ASI), Ishuri rya Cyami ry’Abanyabugenge ba Edinburgh (Royal College of Physicians of Edinburgh/FRCP Edin) ndetse akaba n’Umwarimu wungirije wigisha ubuvuzi mpuzamahanga muri Kaminuza Mpuzamahanga y’ubuvuzi n’Ubuzima kuri bose (UGHE).

Afite ubunararibonye mu rwego rw’ubuzima bw’imyaka igera kuri 15, by’umwihariko mu bijyanye no guhangana n’indwara zandura, akaba amaze kwandika inkuru zirenga 120 zirebana n’ubuzima zasohotse mu binyamakuru by’ubuvuzi byemewe ku rwego mpuzamahanga.

Muri ibi bihe bya COVID-19, Dr. Nsanzimana ni we wari uyoboye urugamba rwa tekiniki rwo guhangana n’icyorezo ku buufatanye n’abandi bayobozi mu nzego z’ubuzima zitandukanye. Guhera mu ntangiriro za 2020, Dr. Nsanzimana ni we wari uyoboye itsinda ngishwanama ry’abahanga mu bya siyansi mu Rwanda.

Prof Muvunyi wamusimbuye, ni impuguke mu by’ubuvuzi, akaba afite impamyabumenyi y’ikirenga (PhD) yakuye muri Kaminuza y’u Rwanda.

Yatangaje ubushakashatsi ku ndwara zitandukanye harimo indwara ya Hepatite, Kanseri y’ibere n’izindi. Yagiye akora ubushakashatsi bwatangajwe mu binyamakuru by’ubuzima na siyansi bitandukanye birimo n’ubwo yakoze ku miti itandukanye ikoreshwa mu Rwanda.

Prof Muvunyi wari n’umwarimu muri Kaminuza y’u Rwanda mu ishami ryigisha Ubumenyi mu bya Laboratwari z’ubuvuzi, kuri ubu yahawe kungirizwa na Bigirimana Noëlla wari uhagarariye ubushakashatsi n’udushya muri RBC.

Please Post Your Comments & Reviews

Your email address will not be published. Required fields are marked *