Rubavu: Abagana Ikigo nderabuzima cya Kigufi barakemanga inyubako zishaje

Bamwe mu baturage bo mu murenge wa Nyamyumba bagana ikigo nderabuzima cya Kigufi batewe inkeke n’Inyubako zacyo zishaje ndetse z’ubatse ku nkombe z’ikiyaga cya Kivu.

Aba baturage bagana ikigo nderabuzima cya Kigufi bavuga ko inyubako zacyo zishaje bikabije ndetse kuba cyubatse ku nkengero z’ikiyaga cya Kivu byateza impanuka.

Majoro, Umuturage wo mu murenge wa Nyamyumba ati “Hamaze imyaka myinshi bivugwa ko iki kigo nderabuzima kigiye kuvugururwa cyangwa kikimurwa kuko aho cyubatse cyateza impanuka, ariko ntabwo tuzi neza nimba ari ubushobozi bwabuze, inyubako zirashaje bikabije ndetse ziracyasakaje amabati atemewe mu Gihugu. Turasaba ko havugururwa inyubako zitangirwamo serivisi ndetse na Serivisi zikongererwa.”

Iki kibazo cy’Inyubako z’ikigo nderabuzima cya Kigufi zishaje cyasuzumwe ndetse gihabwa Umwanzuro n’Inama njyanama y’Akarere, hanateganywa ko ingengo y’imari y’umwaka wa 2017 haragombaga gushyirwamo amafaranga yo ku gisana kikavugururwa ariko tugeze muri 2022 uyu mwanzuro utarabasha gushyirwa mu bikorwa.

Kambogo Ildephonse, Umuyobozi w’Akarere ka Rubavu avuga ko muri gahunda Leta nta nyubako yemerewe kuba igisakaje amabati ya FibroCiment, ariko bijyana n’ubushobozi, ibi bikaba bigomba gukorwa no ku kigo nderabuzima cya Kigufi mu gihe ibitaro bya Gisenyi biteganyijwe ko bizimurwa.

Ati “Muri gahunda za Leta nta nyubako yemerewe kuba igisakaje amabati ya FibreCiment, rero ikigo nderabuzima cya Kigufi turateganya kuvanaho ariya mabati hakajyaho ayandi mu buryo bw’igihe kitarambye, kuko urebye n’aho ikigo nderabuzima cyubatse muri metero 50 uvuye ku nkombe z’ikiyaga cya Kivu biteganyijwe ko kizimurirwa ahitaruye izi nkengero.”

Mu gihe kirambye turacyatekereza uburyo n’Ibitaro bya Gisenyi byazimurwa kuko arinayo mpamvu nabyo ariya mabati ya Fibrociment ataravanwaho.

Ibiro by’Akarere ka Rubavu

Please Post Your Comments & Reviews

Your email address will not be published. Required fields are marked *