Huye: Abakoresha umuhanda Gahenerezo-Huye bahangayikishijwe n’iyangirika ryawo

Abakoresha umuhanda Gahenerezo Huye ku murenge barasaba ubufasha ngo uyu muhanda ukorwe kuko wangiritse kuburyo bamwe mu batwara abagenzi kuri moto batakerekezayo bitewe no kugira impungenge ko wabateza impanuka mu gihe cy’imvura bigatuma basiga abagenzi aho kaburimbo igarukira ahasigaye bakahagenda n’amaguru nk’uko abahatuye n’abahagenda babibwiye Rwandanews24.

Uvuye ku muhanda mukuru wa kaburimbo werekeza ku biro by’Murenge wa Huye, umuhanda ujyayo w’igitaka wangiritse ku buryo abahatuye iyo imvura yaguye batabona umumotari ubatwara bitewe n’iyangirika ryawo.

Nyiraminani ni umucuruzi ukorera mu Mujyi wa Huye, akaba atuye mu kagali ka Rukira, Umudugudu wa Gitwa mu Murenge wa Huye. Mu kiganiro yagiranye na Rwandanews24 agira ati: “Dufite ikibazo gikomeye cy’umuhanda wangiritse bigaragarira buri wese. Nk’ubu mu gihe cy’imvura nta kinyabiziga kizamuka mu Gahenerezo kuko moto igenda isubira inyuma, ku buryo na bamwe mu bamotari bataha inaha bacumbikisha moto zabo iyo imvura yaguye bakazamuka n’amaguru.”

Bamanuka n’amaguru urugendo rurenga ibirometero 5 kuko abamotari batahakorere kubera umuhanda wangiritse

Uwamahoro utuye mu mudugudu wa Nyagasambu mu kagali aka Rukira, ati: “Nkurikije uko abayobozi bacu batubwira, hashize imyaka irenga itatu tubwirwa ko uyu muhanda ujya ku murenge uzakorwa tukajya tugenda dutekanye, ariko tugomba kujya kuzenguruka kaburimbo yose tukazamukira hafi y’I Sovu kugirango tugere mu rugo. Badufashije uyu muhanda wakorwa tukaruhuka gutaha n’amaguru mu gihe cy’imvura.”

Abakoresha uyu muhanda bavuga ko uretse kuba abamotari banga kubatwara iyo imvura yaguye, mu gihe cy’izuba nabwo babaca amafaranga menshi kuko bavuga ko lisansi ihagenda ari nyinshi ndetse ko n’amapine ya moto zabo asaza vuba.

Murenzi ni umumotari ukorera mu karere ka Huye. Aganira na Rwandanews24 yagize ati: “Umuhanda uva mu Gahenerezo ujya ku Murenge wa Huye kuwunyuramo birahenze kuko warangiritse cyane. Kujyayo bisaba guca umugenzi amafaranga menshi ukurikije uko moto iribwangirike utitaye ko agera hafi kuko umuhanda ni mubi. Ibi nabwo tubikora mu gihe cy’izuba kuko iyo imvura yaguye tugarukira kuri kaburimbo ahasigaye bakahagenda n’amaguru n’ubwo urugendo rwaba rusigaye arirwo runini.”

Mugenzi we nawe agira ati: “Kwanga gutwara abagenzi bazamuka mu Gahenerezo si ukwanga amafaranga, ahubwo ushobora kumutwara akaguha 1000fr ariko ukazakoresha moto ku bihumbi 20.000fr. Ubundi barabimenyereye baramanuka bakagera kuri kaburimbo bakabona gutega, keretse iyo babonye umumotari uvuye kujyanayo umuntu bakamanukana. Naho ubundi ntiwabona motari azamutse ngo arashoye azamutse mu Gahenerezo yerekeza ku murenge wa Huye, ariko abamotari bahataha bashobora kujyayo kuko ni iwabo.”

Karangwa utuye muri Rukira agira ati: “Dufite ikibazo gikomeye cy’uyu muhanda kuko haba kumanuka cyangwa kuzamuka, umubyeyi utwite ntiyagenda kuri moto muri uyu muhanda kuko n’inda ishobora kuvamo. Kumwe umuntu arwara biyunguranye cyangwa umubyeyi agafatwa n’inda ukagira ibyago imvura ikaba yaguye, ntiwabona uko ugera kwa muganga kuko moto ntizemera kugenda muri uyu muhanda kuko warangiritse.”

Aba baturage bavuga ko babwirwa kenshi ko uzakorwa, ariko amaso yaheze mu kirere.

Abamotari babasiga aho kaburimbo igarukira bakazamuka n’amaguru

Umuyobozi w’Akarere ka Huye Sebutege Ange avuga ko ikibazo cy’abaturage bakoresha umuhanda Gahenerezo –Huye ku murenge ko bakizi ndetse ko cyamaze guhabwa umurongo, hasigaye gutangira imirimo yo kuwutunganya nk’uko yabibwiye Rwandanews24.

Ati: ‘Uyu muhanda uzatunganywa ku bufatanye n’abaturage kuko nabo bagomba gushyiraho uruhare rwabo. Tuzafatanya kandi n’amashyirahamwe y’urubyiruko rwahuguwe ku gutunganya imihanda ku buryo bugezweho kuko aho bakoraga hagiye kurangira. Uru rubyiruko rubikora neza kandi rufite ibikoresho bigezweho, twizera ko umuhanda uzatunganywa ku buryo bugezwho n’ubwo utahita ujyamo kaburimbo nk’uko biri muri gahunda, ariko washyirwamo imashini ikawutsindagira neza ukaringanizwa.”

Umuhanda Gahenerezo – Huye ku murenge, uri mu gice igishushanyo mbonera cyumujyi wa Huye kigaragaza ko hazaba hari mu gice cy’umujyi wa Huye.

Please Post Your Comments & Reviews

Your email address will not be published. Required fields are marked *