September 16, 2021

Rwandanews24

Publishing Factual, verified and accurate stories

Kigali: Imibare y’abandura icyorezo cya Covid-19 ikomeje kwiyongera

YASUWE 4 

Tariki 14, Werurwe 2020, tariki 14 Kamena 2021 umwaka n’amezi atatu birashize u Rwanda ruhanganye n’icyorezo cya Covid-19.

Hagati y’ukwezi kwa Gatatu ndetse n’ukwa Kane imibare yatangwaga na Minisiteri y’Ubuzima yagaragazaga ko ubwandu bwa Covid-19 butangiye kugenda bugabanuka hirya no hino mu Gihugu, kuko imibare y’abandura yari hasi.

Ibintu byatangiye kugenda bihindura isura mu ntagiriro z’uku kwezi kwa Kamena, dore ko mu minsi irindwi ishize  abarwayi 444 bashya bagaragaye mu mujyi wa Kigali Gusa.

Imibare yatanzwe na Minisiteri y’Ubuzima kuri iki Cyumweru, yagaragaje ko mu Gihugu hose habonetse abarwayi bashya 227 banduye Covid-19 harimo 111 baturutse mu mujyi wa Kigali.

Kuva tariki ya 14 Werurwe 2020 icyorezo cya Covid-19 cyagera mu Rwanda, abantu 27,373 banduye iki cyorezo, abantu 26,341 barakize, kugeza uyu munsi abakirwaye bari kwitabwaho ni 1,662, abarembye ni 9 naho abantu 370 nibo bamaze gupfa bahitanywe n’iki cyorezo ibi byose byavuye mu bipimo 1,505,711 bimaze gufatwa.

Kuva Leta y’u Rwanda yatangira kwakira inking za Covid-19, abantu 389,519 nibo bamaze gukingirwa.

Leta y’u Rwanda irakomeza gushishikariza abanyarwanda ndetse n’abaturarwanda bose, gukomeza kubahiriza amabwiriza yo kwirinda icyorezo cya Covid-19 nkuko yashyizweho n’inzego zibishinzwe.

 

Yanditswe na Theophile Bravery Umunyamakuru wa Rwandanews24